ქვეყნის პირველი პირები, პრემიერ-მინისტრი და პარლამენტის თავმჯდომარე საქართველოს მასშტაბით სხვადასხვა ადგილებში მოსახლეობას ხვდებიან. პრესსამსახურის ინფორმაციით, პარლამენტის თავმჯდომარე, არჩილ თალაკვაძე დეპუტატებთან ერთად დღეს, 17 აგვისტოს ფოთში იმყოფებოდა და მეთევზეებს შეხვდა.

"ვაგრძელებთ შეხვედრებს საზოგადოებასთან მთელი ქვეყნის მასშტაბით. ვხვდებით ჩვენს თანამოქალაქეებს, რომლებიც სოფლებში, ქალაქებში ყოველდღიური საზრუნავის გამო ვერ ახერხებენ პარლამენტში, მთავრობის ოფისებში მოვიდნენ ჩვენთან. ამიტომ, ჩვენ ჩავდივართ მათთან და ვესაუბრებით იმ ძირითად საკითხებზე, რომელიც მათთვის არის მნიშვნელოვანი. ვინიშნავთ პრობლემებს", — განაცხადა თალაკვაძემ.

პრემიერმა კი წეროვანში ახალი სარეაბილიტაციო კომპლექსის მშენებლობა დაათვალიერა და განაცხადა, რომ "ნებისმიერი საზოგადოების თავმოყვარეობა იზომება იმით, თუ რა დამოკიდებულება აქვს მას იმ ხალხთან, რომელიც თავისი სიცოცხლის ფასად იცავს მის ღირსებას და თავისუფლებას, შესაბამისად, ჩვენი გმირი სამხედროებისთვის სოციალური პირობების გაუმჯობესება ნომერ პირველი ამოცანაა". მანამდე პრემიერი, მუცოში იმყოფებოდა.

სოფელ გუგუტიანთკარში, სადაც რუსული საოკუპაციო რეჟიმი მავთულხლართებს ავლებს მოსახლეობა დახმარებას ითხოვს. "მიაქვთ ნაწილ-ნაწილ, ნაგლეჯ-ნაგლეჯ, ნაკუწ-ნაკუწ და ისხედით თბილისში მშვიდად, თქვენი ხომ არაფერი იკარგება", — თქვა ერთ-ერთმა მაცხოვრებელმა. გუგუტიანთკარელებთან იმყოფებოდა შერიგების საკითხებში სახელმწიფო მინისტრი, საკრებულოს რამდენიმე დეპუტატი. სოფელში ჩავიდნენ საქართველოში აკრედიტირებული უცხოელი დიპლომატებიც. პრემიერ-მინისტრი, პარლამენტის თავმჯდომარე, პრეზიდენტი და გორის მუნიციპალიტეტის მერი კი ოკუპირებულ სოფელში ამ დრომდე არ ჩასულან.