ევროპული საქართველოს ლიდერი დავით ბაქრაძე გუგუტიათნკარში საოკუპაციო ხაზთან ჩავიდა და ხელისუფლებასა და ოპოზიციას საერთო პრობლემის წინააღმდეგ ბრძოლისკენ მოუწოდა. მისი თქმით, აუცილებელია შეწყდეს დამაზიანებელი შიდა დისკუსიები და მთელი რესურსი ოკუპაციის შეჩერებას მოხმარდეს.

"აქ დამნაშავე არის მხოლოდ ერთი რუსეთი და ნებისმიერი განცხადება რომელსაც ბრალი გადმოაქვს შიდა ქართულ განსხვავებებზე უადვილებს რუსეთს ბორდერიზაციას და ეხმარება რუსეთს ოკუპაციაში... არ უნდა მივცეთ მთავარ და ერთადერთ დამნაშვავეს, რუსეთს საშუალება ჩვენი შიდა კამათის გამო უპრობლემოდ გააგრძელოს საქართველოს ოკუპაცია და ჩვენი შიდა მიწების მიტაცება", — განაცხადა ბაქრაძემ.

დეპუტატმა აღნიშნა, რომ ევროპული საქართველო მზად არის ჩაერთოს ამ პროცესში და გამოიყენოს საგარეო კონტაქტები.

"ჩვენ ყველა კონტაქტს ვიყენებთ იმისათვის, რომ ჩვენი პარტნიორების მეშვეობით დიპლომატიური და პოლიტიკური ზეწოლით ჩვენი წვლილი შევიტანოთ რუსული ოკუპაციის შეჩერებაშ, ჩვენ მზად ვართ ქვეყნის შიგნითაც ვიმუშავოთ და აქ ჩამოსვლა არის ის სიმბოლური ნაბიჯი რომლითაც გამოვხატავთ, რომ დღეს ჩვენი ამოცანა, ყველას ერთად, ხელისუფლებისაც, ოპოზიციისაც, ძალიან განსხვავებული ადამიანებისაც, ჩვენი ასერთო ამოცანა უნდა იყოს ოკუპაციის შეჩერება და ადგილობრივი მოსახლეობის დახმარება", — განაცხადა ბაქრაძემ.

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა.15 აგვისტოს საოკუპაციო რეჟიმმა მუშაობა განახლა.

რუსი სამხედროები ძელებს არჭობენ საქართველოს მოქალაქეების, რაზმაძეებისა და გუგუტიშვილების ნაკვეთებში. ე.წ. საზღვარს მიღმა ექცევა მათი საცხოვრებელი სახლი, ყანები და წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. ისინი სახლს მთლიანად შლიან და საშენი მასალა გამოაქვთ.

მომხდარს უკვე გამოეხმაურა საერთაშორისო თანამეგობრობა და რუსეთს უკანონო ქმედებების შეწყვეტისკენ მოუწოდა. გუგუტიანთკარში იმყოფებდონენ საქართველოში აკრედიტებული დიპლომატიური კორპუსის წარმომადგენლებიც და ადგილზე გაეცნენ ვითარებას.