"სარკოზი ჯამბაზივით იქცეოდა, იმდენად არაკომპეტენტური იყო", — ასე აფასებს ექსპრეზიდენტი მიხეილ სააკაშვილი საფრანგეთის ყოფილი პრეზიდენტის, ნიკოლა სარკოზის როლს 2008 წლის კონფლიქტის მოგვარებაში. ამის შესახებ მან IWPR-თან ინტერვიუში ისაუბრა.

მისი თქმით, 6-პუნქტიანი სამშვიდობო გეგმა, რომელიც სარკოზმა რუსეთთან შეათანხმა საშინელება იყო და მას საფრანეთის საგარეო საქმეთა მინისტრის, ბერნარ კუშნერის გეგმა ჯობდა. სააკაშვილის განმარტებით, კუშნერის გეგმა საქართველოს ტერიტორიული მთლიანობის პატივისცემას ითვალისწინებდა, სარკოზის გეგმაში კი სამხრეთ ოსეთის სტატუსი საერთაშორისო დისკუსიებზე უნდა განეხილათ და უსაფრთხო ზონები გამოეყოთ. მისი თქმით, ბოლო პუნქტზე თავად რუსებმა თქვეს უარი.

ჟურნალისტის კითხვაზე, რატომ არ გაამხილა ეს დამოკიდებულება 2009-დან 20011 წლამდე, როცა სარკოზის მეგობარივით ექცეოდა, სააკაშვილი პასუხობს: "ჯერ კიდევ პრეზიდენტი იყო, თან საფრანგეთის პრეზიდენტი და მას შეეძლო გადაწყვეტილებების მიღება. ვგულისხმობ იმას, რომ ცდილობდა კეთილი ყოფილიყო ჩვენთან ურთიერთობისას. მათ მოგვცეს ფული სამთო-სათხილამურო კურორტებისთვის კარგი პროცენტით. მოგვცეს ფული თვითმფრინავებსითვის. გვეხმარებოდნენ საერთაშორისო არენაზე, სადაც რუსეთის ჩამოცილება არ უწევდათ".

ევროკავშირის შუამავლობის საფუძველზე საქართველოს და რუსეთს შორის 6-პუნქტიანი გეგმა გაფორმდა. საფრანგეთის პრეზიდენტი სარკოზი ამ მოლაპარაკებებში აქტიურად იყო ჩართული. მხარები შეთანხმდნენ:

  1. ძალის გამოყენებაზე უარის თქმა;
  2. საბრძოლო ქმედებებზე საბოლოო უარის თქმა;
  3. ჰუმანიტარული დახმარებისთვის თავისუფალი მიმოსვლის უზრუნველყოფა;
  4. საქართველოს შეიარაღებული ძალები უნდა დაბრუნდნენ მათი ჩვეულებრივი დისლოკაციის ადგილებში;
  5. რუსეთის შეიარაღებული ძალები უნდა დაბრუნდნენ სამხედრო მოქმედებების დაწყებამდე არსებულ ხაზზე. საერთაშორისო მექანიზმის შექმნამდე, რუსეთის სამშვიდობო ძალები განახორციელებენ უსაფრთხოების დამატებით ზომებს;
  6. საერთაშორისო დისკუსიების დაწყება აფხაზეთსა და სამხრეთ ოსეთში უსაფრთხოებისა და სტაბილურობის პირობების შესახებ.