"საქართველოს სუვერენიტეტისა და ტერიტორიული მთლიანობის მხარდაჭერა", — საქართველოში ევროკავშირის წარმომადგენლობისა და ევროპელი ლიდერების მთავარი გზავნილია რუსეთ-საქართველოს ომის მე-11 წლისთავზე.

ევროკავშირის საელჩოს განცხადებაში ნათქვამია, რომ რუსეთმა ნაკისრი ვალდებულებების დარღვევით არა მხოლოდ შეინარჩუნა, არამედ გაზარდა სამხედრო წარმომადგენლობა როგორც აფხაზეთში, ასევე, ოკუპირებულ ცხინვალში. ევროკავშირი მიესალმება და მხარს უჭერს ჰუმანიტარული და უსაფრთხოების საკითხების გადაჭრაზე მიმართულ ყველა მხარის "გულწრფელ და აპოლიტიკურ მცდელობებს".

"1990-იანი წლებიდან ევროკავშირი საქართველოში კონფლიქტების მშვიდობიანი მოგვარების ხელშეწყობას ცდილობდა. ეს ძალისხმევა არსებითად გაიზარდა 11 წლის წინ და დღემდე გრძელდება. ევროკავშირი გააგრძელებს ამ ძალისხმევას, მათ შორის, სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლის საქმიანობის...", — წერია განცხადებაში.

აგვისტოს ომს ეხმაურება ბრიტანეთის პარლამენტის წევრი ჯონათან ჯანოგლი და ტვიტერზე წერს, რომ 11 წელი გავიდა რუსეთის მიერ ცხინვალის რეგიონის ოკუპაციიდან:

"ნება მოგვეცით დაგანახოთ ჩვენი განგრძობითი მხარდაჭრა საქართველოს სუვერენიტეტის, ტერიტორიული მთლიანობისა და ევრო-ატლანტიკური მისწრაფებებისადმი".

აგვისტოს ომის მე-11 წლისთავს გამოეხმაურა უკრაინის საგარეო საქმეთა სამინისტრო, სადაც ასევე დადასტურებულია მათი მხარდაჭერა საქართველოს ტერიტორიული მთლიანობის მიმართ. განცხადებაში წერია, რომ უკრაინის საგარეო უწყება მხარს უჭერს საქართველოს მთავრობის სამშვიდობო ინიციატივას, "ნაბიჯი უკეთესი მომავლისკენ".

"გამოცდილებამ გვაჩვენა, რომ რუსულ-ქართული კონფლიქტის გაყინვამ, აგრესორს ხელები გაუხსნა და 2014 წელს აგრესიის უკრაინაზე გადატანის საშუალება მისცა", — ნათქვამია განცხადებაში.

ლიეტუვას საგარეო საქმეთა მინისტრი ლინას ლინკევიჩიუსი წერს, რომ რუსეთი კვლავ აგრძელებს საქართველოს ტერიტორიის 20%-ის ანექსიასა და ოკუპაციას.

"სამწუხაროდ, გაკვეთილი ვერ ვისწავლეთ, მას ყირიმი და დონბასი მოჰყვა".

საქართველოს ტერიტორიულ მთლიანობას ლატვიამაც გამოუცხადა მხარდაჭერა. საგარეო საქმეთა მინისტრმა, ედგარს რინკევიჩმა დაწერა, რომ რუსეთმა საქართველოს ტერიტორიების ოკუპაცია უნდა დაასრულოს და ჯარები გაიყვანოს", — ამბობს ედგარ რინკევიჩი.

2008 წლის აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე.

2008 წლის ომის დაწყებიდან 11 წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს, იტაცებს ხალხს და მცოცავი ოკუპაციის პირობებში აცხოვრებს საქართველოს.