საქართველოს საკონსტიტუციო სასამართლომ გააუქმა პატიმრობა ერთი მოხმარებისთვის საჭირო ისეთი ნარკოტიკული საშუალებების შეძენა-შენახვაზე, რომელთა მიღება არ იწვევს შეჩვევას ან აგრესიულ ქმედებას. თუმცა, ძალაში რჩება პატიმრობა ერთი მოხმარებისთვის საჭიროზე მეტი არაშეჩვევადი ნარკოტიკისთვის. ასევე, იმ ნივთიერებებისთვის, რომლებიც შეჩვევას ან აგრესიულ ქმედებას იწვევს.

ამ გადაწყვეტილებით სასამართლომ ნაწილობრივ დააკმაყოფილა სახალხო დამცველის სარჩელო პარლამენტის წინააღმდეგ. ომბუდსმენი მიუთითებდა, რომ სადავო ნორმებით დასჯადი ქმედებები არ წარმოშობდა იმგვარ საზოგადოებრივ საშიშროებას, რაც გაამართლებდა საპატიმრო სასჯელის გამოყენებას. მოპასუხე მხარე, პარლამენტი კი პატიმრობის შეფარდების ლეგიტიმურ მიზნად საზოგადოების ჯანმრთელობის დაცვას და ნარკოტიკების გავრცელების პრევენციას ასახელებდა.

საკონსტიტუციო სასამართლომ განმარტა, რომ ერთი მოხმარებისთვის საჭირო ოდენობის ნარკოტიკული საშუალების, პირადი მოხმარების მიზნით, დამზადება, შეძენა და შენახვა წარმოშობს მისი გასაღებისა და ბრუნვაში მოქცევის მინიმალურ, ჰიპოთეტურ რისკებს. ამავე დროს, საკონსტიტუციომ მიიჩნია, რომ ერთი მოხმარებისთვის საჭიროზე მეტი ნარკოტიკული საშუალების შეძენა-შენახვისას იზრდება, როგორც ნარკოტიკული საშუალებების უკანონონო ბრუნვაში პირის მონაწილეობის ხარისხი, ისე უშუალოდ ნარკოტიკული საშუალების გავრცელების და ამ გზით სხვა ადამიანთა ჯანმრთელობის დაზიანების რისკები.

გარდა ამისა, სასამართლომ მიუთითა, რომ იმ ნარკოტიკული საშუალებების, რომლებიც იწვევს შეჩვევას, თუნდაც ერთჯერადი მოხმარება ისევე, როგორც, აშკარად, პირადი მოხმარების მიზნით დამზადება, შეძენა და შენახვა შეიცავს საფრთხეს საზოგადოებრივი წესრიგისა და უსაფრთხოებისათვის.