ფონდ ღია საზოგადოება - საქართველოს ევროინტეგრაციის მიმართულების მენეჯერი, ივანე ჩხიკვაძე ამბობს, რომ დღეიდან, საქართველოსთან მიმართებით, სავიზო ლიბერალიზაციის პროცედურები ევროპარლამენტზეა დამოკიდებული. მისი თქმით, საკითხს საბოლოოდ ევროპარლამენტმა უნდა უყაროს კენჭი.

მიუხედავად ამისა, ჩხიკვაძე დამატებით აღნიშნავს, რომ სავიზო ლიბერალიზაცია ვერ ამოქმედდება მანამ, სანამ ძალაში არ შევა განახლებული შეჩერების მექანიზმი:

"რაც ყველაზე მთავარია დღევანდელ გადაწყვეტილებაში, ასეთი ჩანაწერი გაკეთდა, რომ უვიზო მიმოსვლა საქართველოსთან მიმართებით ამოქმედდება მას შემდეგ, რაც მიიღებენ განახლებულ შეჩერების მექანიზმს. აქედან გამომდინარე, ეს შემდეგი პროცესია და შეიძლება გადაწყვეტილება მიიღონ, მაგრამ იგი არ ამოქმედდეს მანამ, სანამ შეჩერების მექანიზმს არ მიიღებენ".

ჩხიკვაძე თეორიულად შესაძლებელად მიიჩნევს იმას, რომ თუკი შეჩერების მექანიზმის ამოქმედება ვერ მოეწრო, ევროპარლამენტის კენჭისყრის დადებითი შედეგის შემდეგ, სავიზო ლიბერალიზაცია ვერ ამოქმედდეს. ივანე ჩხიკვაძის ვარაუდით, შესაძლებელია ისიც, რომ სავიზო ლიბერალიზაციისა და შეჩერების მექანიზმის ერთიან პაკეტს, ერთად უყარონ კენჭი.

"შეჩერების მექანიზმი მიღებამდე იგივე გზას გადის საქართველოსთან მიმართებაში. მას ჯერ საბჭომ უნდა უყაროს კენჭი და შემდეგ ევროპარლამენტმა, ანუ პროცედურულად იგივეა".

ივანე ჩხიკვაძის თქმით, ელჩების შეთანხმება ნიშნავს იმას, რომ მათ გადაწყვეტილებას გააფორმებენ, რადგან საბოლოო შეთანხმებაც ელჩების დონეზე მიიღება და როგორც წესი არ იცვლება ხოლმე.

"ის თუ რა დროში შეიძლება უყარონ კენჭი პარლამენტში, რთული სათქმელია. მოლდოვის შემთხვევაში მალევე მოხდა. წესით, დიდი დრო არ უნდა დაჭირდეს იმიტომ, რომ კომიტეტზე უკვე უყარეს კენჭი. ამ შემთხვევაში მგონი, არაფერმა აღარ უნდა შეუშალოს ხელი, რაიმე სასწაული თუ არ ჩავიდინეთ აქ საქართველოში".