20 ივნისის აქციის საქმეზე ჯგუფური ძალადობის მუხლით დაკავებულის, ბეჟან ლორთქიფანიძის გათავისუფლების მოთხოვნით პეტიცია შეიქმნა. პეტიციას ხელს უკვე 2 000-მდე ადამიანი აწერს.

ტექსტში წერია, რომ ბეჟან ლორთქიფანიძე საზოგადოებისათვის ცნობილი პიროვნებაა, საქართველოს ბუნების მკვლევარი და ქომაგი, რომლის სახელსაც არაერთი მნიშვნელოვანი მოვლენა უკავშირდება, მათ შორის:

  • 2003 წელს საქართველოში დიდი ხნის გადაშენებულად მიჩნეული ლეოპარდის აღმოჩენა, საქართველოში პირველად განხორციელებული დათვისა და მგლის ტელემეტრიული კვლევები;
  • მსოფლიოში პირველად ჯიხვის სატელიტური რადიო-საყელოების მეშვეობით კვლევა და სხვ.

პეტიციაში ნათქვამია, რომ ბეჟანი აქტიურად მონაწილეობს საქართველოს ბუნებისდაცვითი ეროვნული სტრატეგიებისა და კანონმდებლობის შემუშავებაში, რის გამოც მას კარგად იცნობენ, როგორც გარემოს დაცვისა და სოფლის მეურნეობის სამინისტროში, ისე -—საქართველოს პარლამენტში.

"სწორედ ბეჟანმა გადაარჩინა გარდაუვალ ლიკვიდაციას 2015 წელს დატბორილი ზოოპარკიდან გამოქცეული ყველასათვის ცნობილი და საყვარელი ბეჰემოთი, სახელად ბეგი. ბეჟან ლორთქიფანიძე არის მაღალი სამოქალაქო შეგნების მქონე, კეთილსინდისიერი ადამიანი. დარწმუნებული ვართ, სასამართლო მას საბოლოდ აუცილებლად გაამართლებს. გვჯერა, რომ მისთვის უკიდურესი აღკვეთის ღონისძიების შეფარდების არავითარი საფუძველი და საჭიროება არ არსებობდა", — ნათქვამია პეტიციაში.

პეტიციის ხელმომწერები მოითხოვენ ბეჟან ლორთქიფანიძეს შეეცვალოს აღკვეთის ღონისძიება, რათა საშუალება მიეცეს დაუბრუნდეს მეუღლეს, ორ მცირეწლოვან შვილს და სამსახურს — ორგანიზაციას, სადაც ის, პრაქტიკულად, მთელი ცხოვრებაა მუშაობს.

ბეჟან ლორთქიფანიძე, სახეობათა კონსერვაციის სამეცნიერო-კვლევით ცენტრ ნაკრესის გამგეობის წევრი და კონსერვაციის პროგრამის დირექტორი, დააკავეს და 20-21 ივნისის ღამეს ანტისაოკუპაციო აქციაში მონაწილეობის დროს ჯგუფურ ძალადობრივ ქმედებაში დასდეს ბრალი (სისხლის სამართლის კოდექსის 225-ე მუხლის მეორე ნაწილი). 27 ივნისს კი სასამართლომ დააკმაყოფილა პროკურატურის შუამდგომლობა და მას, აღმკვეთი ღონისძიების სახით, წინასწარი პატიმრობა შეუფარდა.