თბილისის საქალაქო სასამართლომ 20 ივნისის აქციის საქმეზე დაკავებულ ბეჟან ლორთქიფანიძესა და მორის მაჩალიკაშვილს აღკვეთის ღონისძიებად პატიმრობა შეუფარდა. ამის შესახებ რამდენიმე წუთის წინ გახდა ცნობილი.

"ციხე არ შეგვაშინებს, არც ჩვენ არც ჩვენ მოდგმას. მე აქამდე ვებრძოდი სუს-ს, რომ ერთადერთი ვაჟი მომიკლეს, მძინარე, საწოლში და მოვითხოვდი გაეცათ პასუხები... თურმე მორის მაჩალიკაშვილისთვის დარეკილი ჰქონიათ", — განაცხადა მალხაზ მაჩალიკაშვილმა სხდომის დასრულების შემდეგ.

მათთან ერთად პატიმრობაში დარჩა ბოლო რამდენიმე დღეში დაკავებული კიდევ ოთხი პირი და ირაკლი ოქრუაშვილი. ყველა მათგანს ბრალი სისხლის სამართლის კოდექსის 225-ე მუხლის პირველი და მეორე ნაწილების საფუძველზე აქვთ წაყენებული. ეს მუხლები ჯგუფური ძალადობის ორგანიზებას, ხელმძღვანელობასა და მასში მონაწილეობას გულისხმობს და ექვსიდან ცხრა წლამდე პატიმრობას ითვალისწინებს.

20-21 ივნისის მოვლენებს საქართველოს პროკურატურა სახელმწიფო გადატრიალების მუხლით იძიებს. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორის ორი პოლიტიკური ლიდერი, ნიკა მელია და ირაკლი ოქრუაშვილი.

ამავე თემაზე: რა მოხდა 20 ივნისს თბილისში — მოკლედ