პანკისის სპეცოპერაციის შედეგად მოკლულის, თემირლან მაჩალიკაშვილის მამამ, მალხაზ მაჩალიკაშვილმა რუსთაველის გამზირზე კარავი მაინც გაშალა. მას კარვის გაშლაში #სირცხვილიას ორგანიზატორები და მხარდამჭერები დაეხმარნენ.

მალხაზ მაჩალიკაშვილი საქართველოს პარლამენტთან კარვის გაშლას დილიდან ცდილობს. თავდაპირველად მას პროტესტის გამოხატვის კონსტიტუციური უფლების განხორციელების საშუალება პოლიციამ "თბილისის მერიის მიერ დაგეგმილი სარეაბილიტაციო სამუშაოების საფუძველზე" არ მისცა. მერიაში უარყვეს, რომ პარლამენტის მიმდებარე ტერიტორიაზე სამუშაოები უნდა განახორციელონ და განაცხადეს, რომ მალხაზ მაჩალიკაშვილს ნებისმიერ ადგილას შეუძლია პროტესტის გამოხატვა.

მაჩალიკაშვილის კარავი პოლიციამ 20 ივნისს ანტიოკუპაციური აქციის დაშლის დროს აიღო. მაჩალიკაშვილი ამბობს, რომ კარავში მისი პირადი ნივთებიც იყო და მათი დაბრუნების მოთხოვნით შესაბამის უწყებებს მიმართა, თუმცა უშედეგოდ.

კარვის გაშლას რუსთაველის გამზირზე პოლიცია შარშანაც ეწინააღმდეგებოდა, რასაც დაპირისპირება მოყვა და ზაზა სარალიძე დააკავეს. შვილმკვდარი მამის დაკავება სამოქალაქო საზოგადოებამ გააპროტესტა. არასამთავრობოებმა რუსთაველზე არაერთი კარავი გაშალეს. ქალაქის მერიას და სამართალდამცავებს მოუწიათ კარვები დაეტოვებინათ. ამ კარვებში სარალიძე და მაჩალიკაშვილი რამდენიმე თვე ცხოვრობდნენ.