ინფორმაციის თავისუფლების განვითარების ინსტიტუტის IDFI-ს ინფორმაციით, ჭიდაობის ფედერაციამ ფულადი ჯილდო გადასცა სპორტსმენს, რომელსაც დოპინგის მოხმარებისთვის ევროპის ჩემპიონატის მედალი ჩამოართვეს. როგორც ორგანიზაციაში ამბობენ, სპორტსმენს ჯილდო მედლის ჩამორთმევიდან სამ თვეში გადასცეს.

IDFI-კვლევაში აღნიშნულია, რომ მოჭიდავემ ბრინჯაოს მედალი 2018 წლის ევროპის ჩემპიონატზე მოიპოვა და ამ შედეგისთვის 61 200 ლარის ოდენობის ფულადი ჯილდო გაიცა როგორც სპორტსმენზე, ისე მწვრთნელზე, საექიმო და ადმინისტრაციულ პერსონალზე.

საქართველოს ჭიდაობის ეროვნული ფედერაციის მიერ წარმოებული ფინანსური დოკუმენტაციის შეუსაბამობა, სახსრების არამიზნობრივი განკარგვა და სამინისტროსთან არსებული ვალდებულებების უგულვებელყოფა — ეს ის დარღვევებია, რაც ინფორმაციის თავისუფლების განვითარების ინსტიტუტმა (IDFI) ჭიდაობის ფედერაციის დოკუმენტაციის შესწავლისას გამოავლინა.

IDFI-ს კვლევის თანახმად, 2015-2018 წლებში ჭიდაობის ფედერაციას სპორტის სახელმწიფო მხარდაჭერის პროგრამიდან და სპორტულ შეჯიბრებებში მიღწეული შედეგებისთვის 30 მილიონი ლარი გამოუყვეს. როგორც ორგანიზაციაში ამბობენ, ჭიდაობის სახელმწიფო პროგრამის ფინანსური ანგარიშები სამინისტროს ბიუჯეტის შესრულების ანგარიშებთან თანხვედრაში არაა:

"მაგალითად, 2017 წელს მოწოდებულია მხოლოდ 782 785,38 ლარის ოდენობის ფაქტიური ხარჯების შესახებ ინფორმაცია მაშინ, როცა სამინისტროს 2017 წლის ბიუჯეტის მიხედვით ჭიდაობის სახელმწიფო მხარდაჭერის პროგრამისთვის გამოყოფილი იყო 3 500 000 ლარი".

მათივე თქმით, სამინისტროს მიერ გადარიცხულ, ფედერაციის მიერ დახარჯულ და უკან დაბრუნებულ თანხებს შორის ბალანსი არ არის დაცული. როგორც IDFI-ის ანგარიშშია აღნიშნული, 2017 წლის სამინისტრომ ფედერაციას გადაურიცხა 1 786 835 ლარი, საიდანაც ფაქტობრივი ხარჯი გაწეულია 782 785,38 ლარი, უკან დაბრუნდა 173 001,62 ლარი, ხოლო დანარჩენი 831 048 ლარის შესახებ ინფორმაცია არ არის მოწოდებული.

დეტალურად ანგარიშის შესახებ წაიკითხეთ აქ.