"როგორც იქნა ამ ქვეყანაში ისჯება შრომის უსაფრთხოების ნორმების დამრღვევი კომპანია!" — ასე გამოეხმაურა საქართველოს პრეზიდენტი იმ სამშენებლო კომპანიის დირექტორის დაკავებას, სადაც 16 წლის მოზარდი გარდაიცვალა. ფეისბუქგვერდზე პრეზიდენტი წერს, რომ მოზარდი სწორედ კანონმდებლობის დარღვევამ შეიწირა.

"წელს სამუშაო ადგილზე 21 ადამიანი დაიღუპა, უბედური შემთხვევების უმრავლესობა სამშენებლო სექტორზე მოდის. მიუღებელია ეს სტატისტიკა და ის, რომ ქვეყანაში ასე იღუპებოდნენ ადამიანები!" — წერს პრეზიდენტი.

შინაგან საქმეთა სამინისტროს ინფორმაცით, სამუშაოს წარმოებისას უსაფრთხოების წესის დარღვევის ბრალდებით სამშენებლო კომპანია ჯევიკე ჰოსპიტალიტის დირექტორი დააკავეს. ამ ობიექტზე 16 ივლისს არასრულწლოვანი მუშა დაიღუპა.