BBC და HBO ახალი ტელესერიალის His Dark Materials-ის ტრეილერს ავრცელებენ, სადაც ფანტატიკურ სამყაროში მიმდინარე ომს ვხედავთ, რომელშიც ავტორიტარული ეკლესია და მისი მოწინააღმდეგეები ერთმანეთს ებრძვიან.

სერიალი ბრიტანელი მწერლის სერ ფილიპ პულმანის წიგნს ეფუძნება, რომელშიც მოქმედება ალტერნატიულ სამყაროში ხდება. აქ ყველა პერსონაჟს საკუთარი კომპანიონი ცხოველი ჰყავს, რომლებსაც დეიმონებს ეძახიან. მთავარი გმირი ლაირა ბელაკუაა, რომელიც ოქსფორდში ობლად იზრდება. ბავშვები გაუჩინარებას იწყებენ, ერთ-ერთი მათგანი კი ლაირას საუკეთესო მეგობარი როჯერია. ამ ყველაფრის შემდეგ ის არქტიკაში მის საპოვნელად მიდის და აღმოაჩენს კონსპირაციას, რომელშიც მისი სამყაროს დომინანტი ეკლესიაა ჩართული.

ტრეილერში ვხედავთ, რომ ომი ეკლესიას და მის ოპონენტებს შორის მიმდინარეობს. ლაირა კი ამ ყველაფერს შორის არის გაჩხერილი. ბიძამისი ლორდი ასრიელი, რომელსაც ჯეიმს მაკევოი თამაშობს, ერთ-ერთია, რომელიც ეკლესიას ეწინააღმდეგება. ეკლესიის აგენტ მისის კოულტერს კი ლირა ბოროტი მიზნით საკუთარ ასისტენტად აჰყავს. ცოტა ხანში კი ირკვევა, რომ მას ბავშვების გაუჩინარებაში მისი ხელი ურევია და მათ გაურკვეველი ექსპერიმენტისთვის იყენებენ. ლაირას ალთეომეტრს აჩუქებენ, რის შემდეგაც გადაწყვეტს თავისი მეგობრები ტყვეობიდან დაიხსნას და ეკლესიის გეგმებს ხელი შეუშალოს.

წიგნის პირველი ადაპტაცია 2007 წელს გამოსული ფილმი The Golden Compass-ია, რომელიც წარუმატებელი გამოდგა და მოლოდინები ვერ გაამართლა. ამ ყველაფრის შემდეგ შემდეგი ორი წიგნის ადაპტაცია აღარც უცდიათ. HBO-სერიალის პირველ სეზონში 8 სერია იქნება, პრემიერის თარიღი ამ დროისთვის უცნობია.