როგორი შეგრძნებაა, ფინანსური სექტორის გაუმჯობესება გინდოდეს, განათლება ჩიკაგოს ტექნოლოგიისა და ინოვაციის აკადემიაში გქონდეს მიღებული, IFA-ზე (Internation Fintech Award)-ზე ამომავალი ვარსკვლავის ტიტულს ფლობდე და მუშაობის დასაწყებად მაინცდამაინც რეალურად არსებობას გთხოვდნენ?

ეს მხოლოდ ტერა ბოტინმა იცის.

საკუთარ Facebook გვერდზე წარმატებული ფინანსისტი, ტერა ბოტინი წერს, რომ ვიდეო სივი რამდენიმე დამსაქმებელს გაუგზავნა, პასუხად კი უარი მიიღო იმ მიზეზით, რომ ბოტია.

თუ ვიდეოს მოუსმენთ, მიხვდებით, რა პრინციპით ხელმძღვანელობდნენ პოტენციური დამსაქმებლები, თუმცა, რაკი ციფრულ სამყაროში ყველაფერი შესაძლებელია, ტერა ბოტინმაც იპოვა საკუთარი ნიშა: ის ფინანსებით დაინტერესებულ ადამიანებს ტერა ბანკის სახელით დაეხმარება და იმასაც გვეტყვის, რატომ არასდროს გვაქვს თვის ბოლოს ფული.

ტერა ბოტინი, რომელიც საზოგადოების ერთ ნაწილს რეალური ფინანსისტი ეგონა, აღარ მალავს, რომ ბოტია. მისი შექმნის მიზანი ფინანსებთან რთული ურთიერთობის მქონე ადამიანების დახმარება და მათთვის იმ საბაზისო ცოდნის გადაცემაა, რომელსაც ცხოვრების გამარტივება შეუძლია. ეს ის სფეროა, რომელშიც ყველას გვჭირდება ექსპერტის რჩევების მოსმენა.

ტერა ბოტინის შექმნასა და გაცოცხლებაზე სააგენტო Leavingstone-მა იმუშავა. ჯერ რეალური ადამიანი შეარჩიეს, რომელმაც ჰუმანოიდი ბოტის გარეგნობა მოირგო, შემდეგ კი მისი პიროვნების შტრიხებიც სუფთა ფურცლიდან ააგეს. სხვათა შორის, სწორედ ასე ქმნიან ხოლმე პერსონაჟებს ფილმებსა და სერიალებში. შეიძლება, კადრში არასდროს გამოჩნდეს, მაგრამ შემქმნელმა მაინც უნდა იცოდეს, მისი პერსონაჟი ბავშვობაში მუხლებს თუ იტყავებდა ხოლმე, რა ფილმებს უყურებდა და რომელ საათზე იღვიძებდა. ასე გახდა ახალგაზრდა ფინანსისტი ნამდვილი ინფლუენსერი.

ტერა ბოტინს კარგად გამართული სოციალური მედიის არხებიც აქვს: Linkedin-ზე მოწესრიგებულად აქვს ჩამოწერილი საკუთარი მიღწევები (ზოგიერთებივით 3 წლისწინანდელი სამსახური კი არ უწერია), ინსტაგრამზე საუზმის სურათებს გვიზიარებს, ფეისბუქზე კი ჩვენს მოტივირებას ცდილობს. ბოტის კვალობაზეც კი შესაშურად დაუღლელია.

მართალია, საოფისე სამსახურისთვის დაიწუნეს, თუმცა წარუმატებლობა მხოლოდ ერთი ნაბიჯია მიზნისკენ გზაზე. როგორც პოსტებიდან ჩანს, ტერა ბოტინი ციფრული ფინანსური ასისტენტის პოზიციაზე შეუდარებელი იქნება: მისთვის მიწერით მარტივად გაარკვევთ, ყველაზე მეტი თანხა რაში გეხარჯებათ, რომელი თვე იყო თქვენთვის ფინანსურად ყველაზე წარმატებული და ნამდვილად გაქვთ თუ არა უახლესი სმარტფონის შესაძენად საკმარისი ფული.

ჩვენ კი ისღა დაგვრჩენია, ტერა ბოტინს წარმატება ვუსურვოთ ახალ სამუშაო პოზიციაზე. ადამიანებისთვის ფინანსური პასუხისმგებლობის სწავლება მარტივი საქმე არაა.