TV პირველის ეთერში შინაგან საქმეთა მინისტრ გიორგი გახარიასთან ინტერვიუ ერთ საათზე მეტია, რაც მიმდინარეობს. თემა 20 ივნისის აქციის დაშლაა. გადაცემის წამყვანმა, ინგა გრიგოლიამ გახარიას შინაგან საქმეთა ყოფილი მინისტრი, ვანო მერაბიშვილი გაახსენა, რომელიც ციხეში 26 მაისის აქციის დაშლის საქმეზე ზის.

"გახსოვთ რატომ ზის ციხეში ვანო მერაბიშვილი?.. მიტინგის დარბევის დროს, როცა მაშინდელი ოპოზიცია პროტესტს გამოთქვამდა, ხელისუფლების პასუხი იყო, რომ დაიცვეს სახელმწიფო. ფიქრობთ, რომ ამ მიტინგის დარბევის გამო აღმოჩნდეთ მერაბიშვილის ადგილზე?" — ჰკითხა ჟურნალისტმა მინისტრს.

გიორგი გახარიას თქმით, "ცხოვრებაში ყველაფერი შეიძლება მოხდეს". მინისტრის შეფასებით, 26 მაისი აქციის დაშლა იყო სადამსჯელო ღონისძიება მშვიდობიანი აქციის მიმართ.

აქციის დაშლიდან ამ დრომდე გიორგი გახარიას გადადგომის მოთხოვნით აქციები იმართება. ამ დროის განმავლობაში მოთხოვნა უცვლელია, გადადგეს გიორგი გახარია, რომლის მინისტრობის განმავლობაში დაშლილი აქციის დროს მინიმუმ 160 მოქალაქე დაშავდა, ორმა კი თვალი დაკარგა.