ბათუმში ბებია და შვილიშვილი მიკროავტობუსიდან გადავარდნენ. როგორც შინაგან საქმეთა სამინისტროში On.ge-ს უთხრეს, შემთხვევა 10 ივლისს მოხდა და დაზარალებულები კლინიკაში არიან გადაყვანილი.

აჭარის ტელევიზიის ინფორმაციით, 52 წლის ქალი მძიმედაა დაშავებული და ოპერაცია ჩაუტარდა, ხოლო ერთი წლის ბავშვის მდგომარეობა დამაკმაყოფილებელია. დაზარალებუქალის შვილი, ვიქტორია პოპოვა ყვება, რომ ისინი მიკროავტობუსით მგზავრობდნენ, რომლის კარი ღია იყო, ხოლო ასაკოვანი ქალი და ბავშვი წინა სავარძელზე ისხდნენ. მისივე თქმით, მძღოლმა მოულოდნელად დაამუხრუჭა, რის გამოც ბებია და შვილიშვილი მანქანიდან გადავარდნენ

როგორც საქართველოს პირველ არხს შინაგან საქმეთა სამინისტროში განუცხადეს, მომხდარზე გამოძიება სსკ-ის 276-ე მუხლის მეორე ნაწილით დაიწყო, რაც გულისხმობს ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც ჯანმრთელობის ნაკლებად მძიმე დაზიანება გამოიწვია. ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.