Argadadge.ge შინაგან საქმეთა მინისტრის, გიორგი გახარიას მხარდასაჭერი პეტიციისთვის შექმნილი ვებგვერდია. მოქალაქეთა ნაწილი, სავარაუდო ტროლები და სხვადასხვა ფეისბუქგვერდი მინისტრის პოსტზე დარჩენას ითხოვენ და მიაჩნიათ, რომ მისი გადადგომა ქვეყანას ზიანს მოუტანს.

ვებგვერდზე ჩანს ხელმომწერების სიაც. მათ შორის არიან რეალური პერსონები და ისეთი გვერდები, რომელსაც ჰქვიათ: ნეტარ არიან გლახაკნი სულითა; უფალო გააძლიერე საქართველო ამინ; ნამცხვრები ტორტები საჩხერეში; გაუქმდა გაუქმდააა; იყიდება იყიდება; კოლხურ იბერიული ორდენი; საუდაკი არასამთავრობო ორგანიზაცია; ინ გა ინგული; შემოსავლიანი ინტერნეტ სერვისი; პროფესია ჟურნალისტი; 和 野; ნამდვილი პატრიოტები და სხვა.

ხელმომწერებს შორის არიან ისეთი პირებიც, რომლებსაც პროფილზე უდევთ ფოტოები რუსთავი 2-ის დახურვის მოთხოვნით. ასევე, მოქალაქეები, რომლებსაც ფეისბუქზე სახელი და გვარი რუსულად უწერიათ.

შს მინისტრის გადადგომის მოთხოვნით თბილისსა და სხვადასხვა ქალაქებში 22 დღეა აქციები იმართება. ამის პარალელურად გახარიას მხარდამჭერების ჯგუფში დაგეგმილი იყო კონტრაქცია მისი დარჩენის მოთხოვნით, თუმცა ის არ ჩატარებულა. მინისტრმა თავად მიმართა აქციის მონაწილეებს და თქვა, რომ აქციის ჩატარება სიტუაციას დაძაბავდა.