სამხედრო-პოლიტიკურ საკითხებში ანალიტიკოსის, ამირან სალუქვაძის თქმით, შინაგან საქმეთა მინისტრმა, გიორგი გახარიამ მასთან საუბრისას აღნიშნა, რომ 20 ივნისის აქციის დაშლის დროს ნარინჯისფერი ტყვიები პანკისის აქციების გამოცდილების გამო გამოიყენეს. სალუქვაძე ამბობს, რომ შეხვედრა გუშინ, 9 ივლისს გაიმართა.

"აქ იმოქმედა, გარკვეულწილად, ალბათ, პანკისის აქციამ, როცა, ფაქტობრივად, ზეგავლენა ვერ მოახდინა იმ პატარა ტყვიებმა. ეს მისი მოსაზრება იყო. ეს არის მოსაზრებები, როცა მომხდარის შემდეგ თვითონაც აანალიზებს და ჩვენს ვაანალიზებთ", — განაცხადა სალუქვაძემ კვირას პრესსკლუბში.

მისივე თქმით, გახარიამ ისაუბრა 20-21 ივნისის მოვლენებზე, რომელიც პარლამენტის შენობის წინ დაცვის გაძლიერებიდან აქციის დაშლამდე ვითარდებოდა.

"მან ციფრებიც კი დაასახელა, რომ თუ საშუალოდ დღეში რომელიმე პარტია ორ-სამ საშვს უშვებდა, ამ შემთხვევაში დეპუტატები ახდენდნენ 10 და მეტი საშვის დაშვებას. მთლიანობაში, ეს, რა თქმა უნდა, საკმაოდ დიდ ციფრს მიიღებდა. დავუშვათ, რომ 30-40-მა დეპუტატმა 10-20 ადამიანი რომ შეიყვანოს, გამოდის რამდენიმე ასეული მხარდამჭერი შიგნით. ეს იყო ერთ-ერთი მიმანიშნებელი, რის გამოც მიიღეს ის ზომები, რაც მიიღეს", — განმარტავს სალუქვაძე.

გარდა ამისა, მისი თქმით, მინისტრმა ისაუბრა პოლიციელების მხრიდან გადაცდომასა და საშტატო აღჭურვილობაზე, რომელიც პოლიციამ აქციის დაშლის დროს გამოიყენა:

"მინისტრმა ისაუბრა, რომ ეს ტყვიები არის ლეტალური, მან წარმოადგინა ტყვიების ფოტომასალა და გვაჩვენა ისინი. ნებისმიერი იარაღი, რასაც იყენებს პოლიციელი, შეიძლება, აღმოჩნდეს ლეტალური, გააჩნია როგორ გამოიყენებ, ფარითაც შეიძლება მოკლა ადამიანი, ხელკეტით და წყლის ჭავლითაც შეიძლება ადამიანს თავი წააცალო".