დღეს, საქართველოს მთავრობასა და ანაკლიის განვითარების კონსორციუმს შორის ღრმაწყლოვანი ნავსადგურის მშენებლობისა და ოპერირების შესახებ საინვესტიციო ხელშეკრულება გაფორმდება.

საქართველოს მთავრობის პრესსამსახურის ინფორმაციით, ანაკლიის ღრმაწყლოვანი ნავსადგური რამდენიმე ეტაპად აშენდება, პროცესი 9 ფაზას მოიცავს.

პორტი 400 ჰექტარის ფართობზე შენდება და მისი მშენებლობისა და განვითარების ღირებულება 2,5 მილიარდ აშშ დოლარს შეადგენს. პორტის გამტარუნარიანობა, წელიწადში 100 მილიონი ტონა იქნება.

პრესსამსახურის ინფორმაციით, ნავსადგური 2020 წელს გაიხსნება. პროექტი საქართველოში ათასობით ახალ სამუშაო ადგილს შექმნის.

ხელშეკრულება დღეს, 2 საათზე გაფორმდება. ხელმოწერის ცერემონიას, ანაკლიაში, საქართველოს პრემიერ-მინისტრი გიორგი კვირიკაშვილი, საქართველოს პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი, ანაკლიის განვითარების კონსორციუმის დამფუძნებლები - მამუკა ხაზარაძე და კურტ კონტი, ასევე კომპანია Van Oord-ის რეგიონული დირექტორი გოვერტ ვან ოორდი დაესწრებიან.