ტელეკომპანია რუსთავი 2–ის გენერალური დირექტორი ნიკა გვარამია დღეს, 12 საათისთვის განმარტებებს გააკეთებს იმ ფარული ჩანაწერთან დაკავშირებით, რომელიც შუაღამისას გამოქვეყნდა. ამის შესახებ გვარამია ფეისბუკზე, პირად გვერდზე წერს.

ნიკა გვარამიასა და საქალაქო სასამართლოს ყოფილი თავმჯდომარის 3–წუთიანი და 19–წამიანი საუბარი გამოაქვეყნა იუთუბ არხმა creative Georgian news. აღნიშნული ჩანაწერის გარდა, ამ არხს კიდევ 2 ვიდეო აქვს ატვირთული: ნიკა გვარამიას საუბარი პაატა ბურჭულაძესთან და მიხეილ სააკაშვილის საუბრები თავის თანაგუნდელებთან.

ნიკა გვარამია ფეისბუკზე წერს, რომ როგორც მან გაიხსენა, ეს არ არის ფარული სატელეფონო ჩანაწერი, დანარჩენზე კი დღეს დაგეგმილ ბრიფინგზე ისაუბრებს:

"ეს ფსკერია უკვე, ძვირფასო მეგობრებო. მთავარია დადონ რამე, სადაც ჩემი ხმა ისმის, და უკვე შინაარსს აღარც უსმენენ. ამას ჰქვია ფარული ჩანაწერებით თვითდაზიანება. p.s. მე რომ პირადი ცხოვრება აღარა მაქვს ამ ქვეყანაში, ეგ უკვე არახალია".

საქალაქო სასამართლოს უკვე ყოფილი თავმჯდომარე, მამუკა ახვლედიანი, რუსთავი 2–ის გენერალურ დირექტორთან განიხილავს სასამართლო სისტემაში უზენაესი სასამართლოს თავმჯდომარის, ნინო გვენეტაძის მმართველობის შემდეგ შექმნილ პრობლემებს:

"ის (ნინო გვენეტაძე) სავარჯიშო ბალიშივითაა, იქით არის, მთავრობის მხარეს არის მთლიანად. და ყველა პოზიციას... ახლა რაღაცები გავიარე კიდევ საღამოს და აპელაცია თურმე მთლიანად... აპელაციაში რა ქნეს იცი? ვადა რომ ამოეწურა, ეს გვენეტაძე მართლა უტვინოა, ვირის ჭკუაზე ოდნავ მეტი ჭირდებოდა, რომ რაღაც ნორმალურად ყოფილიყო. მართლა გულით მწყდება. გულით მეგონა, რომ რაღაცას მაინც არ გააფუჭებდა".

მამუკა ახვლედიანი ჩანაწერში ასევე საუბრობს იმის შესახებ, რომ ნინო გვენეტაძეს სურს სააპელაციო სასამართლო დააკომპლექტოს ე.წ. თავისი მოსამართლეებით, რის გამოც კრიზისია შექმნილი და ვერ ასწრებენ საქმეების განხილვას მოსამართლეთა არასაკმარისი რაოდენობის გამო.

საქალაქო სასამართლოს ყოფილი თავმჯდომარე ასევე საუბრობს მოსამართლეთა ვადის შეწყვეტით გამოწვეულ პრობლემებზე, რაც მისი მტკიცებით, კონკრეტული სისხლის სამართლის საქმეებზე აისახა. მისივე თქმით, "ასეთი განუკითხაობა არასდროს არ ყოფილა სასამართლოში. ხმას ევერ იღებს ვერავინ".

ჩანაწერის ბოლოს ისმის მამუკა ახვლედიანის ხმა, რომელიც ამბობს, რომ მას აღარაფერი არ უნდა და სადმე წავიდოდა, დარწმუნებული რომ იყოს, ოჯახი არ დარჩება მშიერი.

"რა უნდა კაცო მაგის იმედს, ეგ არ არის რთული" – ნიკა გვარამიას ამ სიტყვებით სრულდება ფარული ჩანაწერი.