დავით ნიორაძე ერთ-ერთია იმ დაშავებულებს, შორის, რომელსაც სპეცრაზმი ფიზიკურად გაუსწორდა. ტელეკომპანია რუსთავი 2-ის გავრცელებულ კადრებში ჩანს, როგორ ურტყამენ მას სამართალდამცავები.

მისი თქმით, 20 ივნისის მან აქციის დაშლა ტელევიზიით ნახა და რუსთაველზე ამის გამო გავიდა. მისი დაკავების მომენტი მანვე გადაიღო ტელეფონით.

"რომ დამაკავა, შემიყვანეს თავის ალყაში, დამაწვინეს ძირს და მაგრად "დამიმუშავეს" ფერდები... ჩამიტეხეს მარჯვენა მხარეს მეთერთმეტე ნეკნი. ცდილობდნენ ტელეფონის წართმევას და არ მივეცი, ამაზე უფრო გაბრაზდნენ... მანქანაში ჩაჯენის დროს მოვიდა ერთი სპეცრაზმელი და დამარტყა სახეში", — უყვება რუსთავი 2-ს ნიორაძე.

20 ივნისის აქციის დაშლის დროს მინიმუმ 160 ადამიანი დაშავდა, მათგან ორს სპეცრაზმელის ტყვიამ თვალი დააკარგინა. ამ მიზეზით დღემდე თბილისში აქციები იმართება. მოთხოვნა უცვლელია, გადადგეს შინაგან საქმეთა მინისტრი, გიორგი გახარია.