რუსული გამოცემა ინტერფაქსი, პრეზიდენტის პრესსპიკერ დმიტრი პესკოვზე დაყრდნობით წერს, რომ რომის პაპმა ვლადიმერ პუტინი "მსოფლიოს მფარველი ანგელოზის" მედლით დააჯილდოვა. პუტინის "ახალი ჯილდოს" შესახებ ინფორმაცია თავდაპირველად ჩეჩნეთის მმართველმა, რამზან კადიროვმა გაავრცელა.

რუსული მედიის ინფორმაციით, ეს მედალი პირველი მსოფლიო ომის დასრულების 100 წლისთავს ეძღვნება და მასზე წერია პაპ პია XII-ის ციტატა: "არაფერი იკარგება მშვიდობაში. ყველაფერი შეიძლება დაკარგო ომში".

გადაცემა საუბრები რელიგიაზეს ავტორი ლევან სუთიძე განმარტავს, რომ პაპის მიერ გადაცემული მედალი არა ჯილდო, ან რაიმე სახის ორდენი, არამედ უბრალო საჩუქარია. მისი თქმით, ვატიკანის სტუმრები საჩუქრად სხვადასხვა სახის მედლებს იღებენ.

"პაპის საჩუქარი პუტინისთვის ჯილდო კი არა, ქვეტექსტი და მშვიდობისკენ მოწოდებაა. არავითარი დაჯილდოების ცერემონია არ ყოფილა", — წერს ის ფეისბუქზე.

ინტერფაქსი, ასევე, წერს, რომ მედლის გარდა პაპმა პუტინს გრავიურა აჩუქა, რომელზეც წმინდა პეტრეს მოედანია გამოსახული. მათი ინფორმაციით, პაპმა პუტინს უთხრა: "იმისთვის, რომ რომი არ დაგავიწყდეთ". პუტინმა კი პაპს მოციქულ პეტრესა და პავლეს ხატი აჩუქა .

რომის პაპი და პუტინი ერთმანეთს ვატიკანში 4 ივლისს შეხვდნენ. გავრცელებული ინფორმაციით, დახურულ კარს მიღმა მათი საუბარი ერთი საათი გაგრძელდა, რის შემდეგაც საჩუქრები გაცვალეს.

შესწორება: სტატიის თავდაპირველი სათაურში ეწერა, რომ რომის პაპმა პუტინს "მსოფლიოს მფარველი ანგელოზის" მედლით დააჯილდოვა. რუსული მედია წერს, რომ მედალს "Ангел-Хранитель мира" ჰქვია, რაც შეიძლება ითარგმნოს, როგორც მშვიდობად, ასევე, მსოფლიოდ. თუმცა, მედალის შინაარსი ხაზს უსვამს მშვიდობის მნიშნველობას. აქედან გამომდინარე სათაური შეიცვალა.