პირველი არხის დირექტორი "უსინდისო ფეიკს" უწოდებს ინფორმაციას იმის შესახებ, რომ წამყვანი ბაჩო ქაჯაია არხიდან ანტიოკუპაციური მაისურის ჩაცმის გამო გაათავისუფლეს. ვასილ მაღლაფერიძე "სულელებად" და "ავადმყოფებად" მოიხსენიებს ყველას, ვინც ამბავი "ააგორა" და გაავრცელა. მისი აზრით, ამის მიზანი პირველი არხის დისკრედიტაცია იყო.

"ამგვარი სისულელე მხოლოდ ისეთ ავადმყოფ თავში შეიძლება გაჩენილიყო, რომელმაც დღეს გაიგო, რომ რუსეთი ოკუპანტია, რომელსაც რუსეთთან არც ერთი ომი არ შეხებია, არ განუცდია და ჰგონია, რომ დიდი გმირობა სჭირდება რუსეთი ოკუპანტიას ძახილს... ისევე როგორც მთელ ქვეყანაში, არც საქართველოს პირველ არხზე საკუთარ თავს არავინ აკადრებს, რომ ბაჩოს ან საერთოდ ვინმეს უსაყვედუროს, რუსეთზე ოკუპანტი რატომ თქვიო. ერთი ორი შლეგი ყველგანაა და მათ სათვალავში ნუ მივიღებთ. მე მგონია, რომ არც ერთ ადამიანს, რომელიც საკუთარ გონიერებას ოდნავ მაინც პატივს სცემს, წესით ასეთი სულელები არ უნდა ვეგონოთ, თუმცა, ყველა საკუთარი სამრეკლოდან იყურება", — წერია მაღლაფერიძის განცხადებაში, რომელსაც საზოგადოებრივი მაუწყებელი ავრცელებს.

მაღლაფერიძე ამბობს, რომ მსავსი დეზინფორმაციის გამავრცელებლები მის განმარტებას ყურადღებას არ მიაქცევენ და მაინც იმავეს გაიმეორებენ.

"ამიტომ მათთვის საყვარელ და, როგორც ჩანს, ერთადერთ გასაგებ ენაზეც დავუმტკიცებ ამ ფეიკის მომგონებლებსაც და ამგორებლებსაც: მტყუნის ….. ……! წერტილების ადგილას ასოების ჩაწერა წესით არ უნდა გაუჭირდეს, ვისაც ეს ეხება", — წერს საზოადოებრივი მაუწყებლის დირექტორი.

გუშინ, 5 ივლისს საზოგადოებრივი მაუწყებლის გადაცემის ღამის შოუ პირველზე წამყვანმა, ბაჩო ქაჯაიამ თქვა, რომ ის და მისი შემოქმედებითი ჯგუფი სამართლიან პროტესტს უერთდება, რომელიც 20 ივნისს პარლამენტში რუსი ოკუპანტების მისვლამ გამოიწვია. ამის შესახებ წამყვანმა გადაცემის დაწყებამდე მონოლოგში ისაუბრა. მას ანტიოკუპაციური მაისური ეცვა.

გუშინვე გავრცელდა ინფორმაცია, რომ ქაჯაიას არხიდან გაათავისუფლეს, რაც აქცია #სირცხვილიას ორგანიზატორმა ტრიბუნიდან გააჟღერა. სწორედ ამ განცხადებას უპასუხა ვასილ მაღლაფერიძემ.