ქეთათო პოპიაშვილის კრიტიკის მიუხედავად, ირაკლი ჩარკვიანის, იგივე მეფის, სიმღერებს აქცია #სირცხვილიაზე მაინც აჟღერებენ. მეფის სიმღერები დღევანდელ, 4 ივნისის აქციაზე მეორედ შესრულდა.

ირაკლი ჩარკვიანის სიმღერები შეასრულეს ზურა ჯავახიამ და ანი სუბელიანმა. სუბელიანმა სიმღერის შესრულებამდე განაცხადა, რომ მეფის შემოქმედება ყველასია.

რამდენიმე დღის წინ ქეთათომ ასეთი შინაარსის პოსტი გამოაქვეყნა:

"როდესაც ოკუპაციას, უსამართლობას აპროტესტებ, შენ თვითონ სხვისი საკუთრების, ინტელექტუალური საკუთრების მაჯლაჯუნა მიმტაცებელად არ უნდა მოგვევლინო".

ირაკლი ჩარკვიანის გარდაცვალების შემდეგ, მის შემოქმედებაზე საავტორო უფლებები ცოლს გადაეცა. ეს პირველი შემთხვევა არაა, რაც ქეთათო ირაკლი ჩარკვიანის სიმღერების გამოყენებას საჯაროდ აპროტესტებს. 2017 წლის ბოლოს, მუსიკის კოლექციონერ ჯაბა შავიშვილს, მიღებული რეპორტის გამო YouTube-ის არხი წაუშალეს, სადაც ჩარკვიანის გარდა, ათასზე მეტი ქართული კომპოზიცია ჰქონდა განთავსებული. მაშინ შავიშვილი წერდა, რომ მის იუთუბ არხზე არსებული სიმღერების დიდი ნაწილის ასლი არ არსებობდა.