ქართული პროექტი ინგა ევროპის ევრიმაჟის ფონდის ერთ-ერთი გამარჯვებული გახდა. როგორც Film New Europe-ის ოფიციალურ ვებგვერდზე ვკითხულობთ, პროექტი 10 გამარჯვებულს შორის მოხვდა და კოპროდუქციის ფარგლებში 60 000 ევროს მიიღებს. ფილმის რეჟისორის გიორგი გოგიჩაიშვილის ინფორმაციით ინგა ერთადერთი პროექტია, რომელმაც მიიღო Unanimous Vote, ანუ სამუშაო ჯგუფის ყველა წევრმა ქვეყანამ ერთხმად დაუწერა 10 ქულა.

ინგა საქართველოს, ლიეტუვის და ლუქსემბურგის ერთობლივი პროდუქციაა, რომლის გადაღებაც 2019 წლის ბოლომდეა დაგეგმილი.

  • რეჟისორები: გიორგი გოგიჩაიშვილი, დავით აბრამაშვილი
  • სცენარი: ზაზა კოშკაძე, მარი ბექაური და გიორგი გოგიჩაიშვილი
  • პროდიუსერები: გეგა ხმალაძე, მაგდა დათუაშვილი

პროექტი სტუდია Sibler Films-ს ეკუთვნის. მათი წინა ნამუშევარი მოკლემეტრაჟიანი ფილმი რვა წუთია, რომელმაც მსოფლიოს მასშტაბით არაერთი ჯილდო მოიპოვა მოკლემეტრაჟიანი ფილმების ფესტივალებზე.

რეჟისორმა გიორგი გოგიჩაიშვილმა On.ge-ს კიდევ ერთი საინტერესო ფაქტი გაუზიარა: ინგას კოსტიუმებზე ლიეტუველი მხატვრები იმუშავებენ, რომლებიც აქამდე ყველასთვის კარგად ნაცნობი სერიალ Chernobyl-ის დამდგმელ მხატვრებთან ერთად მუშაობდნენ.