პარლამენტთან მოშიმშილე ახალგაზრდებიდან ერთ-ერთი, გიორგი ლემონჯავა ჯანმრთელობის მდგომარეობის გაუარესების გამო საავადმყოფოში გადაიყვანეს. ის კლინიკა "ამტელ ჰოსპიტალშია" მოთავსებული, სადაც სამედიცინო გამოკვლევები უტარდება.

აქცია #სირცხვილიას მონაწილეების ნაწილი შინაგან საქმეთა მინისტრის, გიორგი გახარიას გადადგომის მოთხოვნით მეცხრე დღეა შიმშილობენ. მათ შორის არიან ბექა ბასილაია და ილიას სახელმწიფო უნივერსიტეტის სტუდენტები გვანცა არევაძე და თაკო მეტრეველი, რომლებიც პარლამენტის წინ კარვები გაშალეს. მოშიმშილეთა შორისაა 2008 წლის რუსეთ-საქართველოს ომის მონაწილეც.

საქართველოში ანტისაოკუპაციო აქციები #სირცხვილია მე-11 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. 20 ივნისის ღამეს, შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. ხელისუფლების პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება.