პოლ მაკარტნიმ ტეხასის უნივერსიტეტის ხელმძღვანელობას ცხოველებზე ექსპერიმენტების შეწყვეტა სთხოვა. მიმართვას PETA ავრცელებს. წერილში ლეგენდარული ბრიტანელი მუსიკოსი ტეხასის A&M უნივერსიტეტის პრეზიდენტს, მაიკლ იუნგს მიმართავს და მას სთხოვს, შეწყვიტოს კუნთოვანი დისტროფიის კვლევები ოქროსფერ რეტრივერებზე და ისინი გაანთავისუფლოს.

ამ მიმართვის მიზეზი PETA-ს მიერ გავრცელებული ვიდეო გახდა, სადაც მათი მტკიცებით უნივერსიტეტის ლაბორატორიაში ექსპერიმენტის მონაწილე ოქროსფერი რეტრივერები არიან ასახულები. ცხოველთა დაცვის ორგანიზაციის განცხადებით, ძაღლებს ხელოვნური სელექციით ამრავლებენ და ამგვარად აკვირდებიან კუნთოვანი დისტროფიის გენის მუტაციას. ექსპერიმენტში მონაწილე ცხოველებს კი მეტალის გალიებში აცხოვრებენ.

მაკარტნიმ ნანახს "შემზარავი" უწოდა და იუნგი "მსგავსი სისასტიკის დაშვებისთვის" გააკრიტიკა.

"მე ძაღლები ბავშვობიდანვე მყავდა და ისინი განსაკუთრებით მიყვარდა. მათ შორის იყო ჩემი კომპანიონი დაახლოებით 15 წლის მანძილზე, მართა, რომელსაც სიმღერა "Martha My Dear" მივუძღვენი"- ვკითხულობთ მაკარტნის წერილში.

ტეხასის A&M უნივერსიტეტის წარმომადგენელმა, კელი ბრაუნმა აღნიშნულ ფაქტზე კომენტარი ვერ გააკეთა, რადგანაც მოცემულ მომენტში უნივერსიტეტსა და PETA-ს შორის სასამართლო დავა მიმდინარეობს.

აღსანიშნავია, რომ მოცემულ მომენტში კუნთოვანი დისტროფიის განკურნება ვერ ხერხდება.

პოლ მაკარტნი დიდი ხანია რაც ვეგეტარიანელია და იგი აქამდეც უჭერდა მხარს PETA-ს ცხოველებზე ექსპერიმენტების წინააღმდეგ ბრძოლაში.

2009 წელს პოლმა ქალიშვილებთან, მერი და სტელა მაკარტნებთან ერთად არაკომერციული მოძრაობა Meat Free Monday წამოიწყო. აღნიშნულით ისინი ცდილობენ წაახალისონ ადამიანები, რომ თუნდაც კვირაში მხოლოდ ერთი დღით დათმონ ხორცის პროდუქცია.