19 თებერვალს რუსთავი 2-ზე, ეკა კვესიტაძის საავტორო გადაცემაში განსხვავებული აქცენტები, ოდესის გუბერნატორ მიხეილ სააკაშვილთან ექსკლუზიური ინტერვიუ გავიდა, რომელშიც ექსპრეზიდენტი საქართველოს ეკონომიკური განვითარების საკითხს შეეხო.

ანაკლიის პორტის მშენებლობაზე საუბრისას, სააკაშვილმა აღნიშნა, რომ მათი იდეა განსხვავებული იყო, რადგან ლაზიკა ქალაქის აშენებასაც გულისხმობდა. ექსპრეზიდენტის თქმით, პორტის აშენების იდეაც დაგვიანებულია, რადგან 2013-2015 წლები იყო ის პერიოდი, როდესაც ლაზიკის პორტში უამრავი ამერიკული ტვირთი შემოვიდოდა ავღანეთიდან, რაც საქართველოს ეკონომიკას მნიშვნელოვნად გააძლიერებდა.

"თავის დროზე, სინგაპური ამერიკის მე-5 ფლოტმა განავითარა, მაშინ დაიწყო მასობრივი მოძრაობა აზიაში, მთელი ეს ნაკადები სინგაპურმა წამოიღო და გახდა დიდი პორტი. მაშინ ამას ვერ წარმოვიდგენდი, მაგრამ ამ პერიოდში დაიკეტა ოდესის პორტიც, რაც ნიშნავს იმას, რომ რუსული ტვირთიც ლაზიკაში შემოვიდოდა, ეს ნამდვილი ბუმი იქნებოდა" - თქვა მიხეილ სააკაშვილმა.

ექსპრეზიდენტმა საუბრისას აღნიშნა, რომ საქართველო მხოლოდ სრული, სერიოზული ურბანიზაციის პირობებში განვითარდება. სააკაშვილის თქმით, მისი პრეზიდენტობის დასაწყისში, თბილისის გარდა არც ერთი ქალაქი, არც ბათუმი ან ქუთაისი, იყო ინფრასტრუქტურულად განვითარებული.

"ჩვენ შევცვალეთ კონსტიტუცია და ლაზიკაში დავუშვით ინგლისური სამართალი. ეს იყო ჩემი პასუხი იმაზეც, რომ ვერ შევძელით სასამართლო სისტემის გამოსწორება. ლაზიკაში ჩამოვიდოდნენ ინგლისელი და ქართველი მოსამართლეები, რომლებიც საქალაქო და სისხლის სამართლის საქმეებს გადაწყვეტდნენ" - თქვა მან.

მიხეილ სააკაშვილმა აღნიშნა, რომ ლაზიკის პროექტის განვითარება საქართველოს მოსახლეობას მკვეთრად გაზრდიდა, როგორც ეს ბათუმის აშენების შემთხვევაში მოხდა. მისი თქმით, ლაზიკა აფხაზეთის მოსახლეობას მოიზიდავდა და ამის გარდა უცხოეთში წასულ ქართველებსაც გაუჩენდა სამშობლოში დაბრუნების სურვილს.