საკონსტიტუციო სასამართლომ სისხლის სამართლის კოდექსის 273-ე მუხლის ის ნორმატიული შინაარსი ცნო არაკონსტიტუციურად, რომელიც მარიხუანის განმეორებითი მოხმარებისთვის სასჯელად თავისუფლების აღკვეთას გულისხმობდა.

აღნიშნული გადაწყვეტილების მიღებისას, საკონსტიტუციო სასამართლო 2015 წლის 24 ოქტომბრის ბექა წიქარიშვილის საქმეზე მიღებულ გადაწყვეტილებას დაეყრდნო, რომლის თანახმადაც, სასამართლომ არაკონსტიტუციურად სისხლის სამართლის კოდექსის 260-ე მუხლის მე-2 ნაწილით დადგენილი ის წესი ცნო, რომელიც თავისუფლების აღკვეთას მარიხუანის პირადი მოხმარების მიზნისთვის უკანონო შეძენა-შენახვის გამო ითვალისწინებდა:

"სასამართლომ საქმეზე ბექა წიქარიშვილი საქართველოს პარლამენტის წინააღმდეგ გადაწყვეტილებით, არაკონსტიტუციურად ცნო სასჯელის სახით თავისუფლების აღკვეთა პირადი მოხმარების მიზნით 70 გრამამდე გამომშრალი მარიხუანის შენახვისათვის. პირადი მოხმარების მიზნით, ამ რაოდენობით მარიხუანის შენახვა თავისთავად მიუთითებს მისი განმეორებით ან თუნდაც რუტინულად მოხმარების რეალურობაზე და ამ პირობებშიც უკვე დადგენილია სასჯელის სახით თავისუფლების აღკვეთის გამოყენების არაჰუმანური ხასიათი.

აღნიშნულიდან გამომდინარე, მარიხუანის განმეორებით ან არაერთგზის მოხმარება არ წარმოადგენს იმაზე მეტი საფრთხის შემცველ ქმედებას, ვიდრე მისი 70 გრამამდე პირადი მოხმარების მიზნით შენახვა. სასჯელი, რომელიც არაპროპორციულად იქნა მიჩნეული ამ უკანასკნელი ქმედებისთვის, ასევე არაპროპორციული იქნება მარიხუანის განმეორებით მოხმარებისთვის. შესაბამისად, სადავო ნორმით დადგენილი რეგულირება არ საჭიროებს პროპორციულობის არსებითი განხილვის ფორმატში ხელახალ შეფასებას".

სასამართლოს გადაწყვეტილება ძალაში საკონსტიტუციო სასამართლოს ვებსაიტზე განჩინების გამოცხადებისთანავე შევა.