რეგიონის ჟურნალისტებთან შეხვედრისას ყოფილმა პრემიერმინისტრმა ბიძინა ივანიშვილმა პაატა ბურჭულაძეზე დასმული კითხვის პასუხად იხუმრა და თქვა, რომ მას არ შეუძლია ამ თემაზე სერიოზული საუბარი:

"იცით, ანეკდოტები ძალიან ბევრი დადის, ბოლო ანეკდოტი ასეთია, რომ მან პარტია შექმნაო თუ როგორო? დამკრძალავი ბიუროო. წრეს დაარტყამენ და მიდიან".

ბიძინა ივანიშვილმა პაატა ბურჭულაძე და გიორგი მარგველაშვილი რეკორდსმენებს შეადარა:

"ქართველები მართლა ნიჭიერი ხალხი ვართ, გინესის წიგნის წევრები გვყავს რამდენიც გნებავთ. მარგველაშვილი გინესის წიგნში შევიდა. მოვიდა თუ არა, მეორე დღესვე საკუთარ გუნდს დაუპირისპირდა და ბურჭულაძემაც მე მგონი, მაგარი რეკორდები დაამყარა. ამხელა იუმორი პოლიტიკაში, მგონი, არავის არ შემოუტანია. ასე მოკლე დროში კაცმა თავი გაიფარჩაკოს, როგორც მან მოახერხა, იშვიათია. მე სერიოზულად მაგის გამონათქვამებს ვერ ვუპასუხებ, მხოლოდ ღიმილით.

ყველას უნდა, რომ ოპონენტად განმიხილონ, რადგან საზოგადოებაში გარკვეული იმიჯი მაქვს. ნაცვლად იმისა, რომ ნათელაშვილს ეკამათონ, სადაც ისინი არიან რეალურად და ნათელაშვილთან ახლოს ცურაობენ, მაინცდამაინც ბიძინა ივანიშვილზე უნდათ სწორება გააკეთონ. ცდილობენ ჩემს დებატებში ჩათრევას და ცდილობენ იმიჯი ამით გაიუმჯობესონ".

ტელეკომპანია იმედის ჟურნალისტმა ივანიშვილს ჰკითხა, შეესაბამებოდა თუ არა ბურჭულაძის ბრალდება მის მიერ გირჩის დაფინანსების შესახებ.

შეხვედრები რეგიონულ მედიასთან - ასე ჰქვია ტელეკომპანია GDS-ის საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.