რუსთაველის თეატრის სამხატვრო ხელმძღვანელი და მოსკოვის თეატრის Et Cetera-ს მთავარი რეჟისორი, რობერტ სტურუა თბილისის მოვლენებს ფეისბუკპოსტით გამოეხმაურა:

"ბოროტმა სულმა იმარჯვა... ნაცისტები ზეიმობენ: ს ა ქ ა რ თ ვ ე ლ ო აღარ არის!"

რობერტ სტურუას სახელით ფეისბუქზე რამდენიმე ანგარიში იძებნება. On.ge დაუკავშირდა შოთა რუსთაველის სახელობის სახელმწიფო თეატრს, რათა გაერკვია რომელი ეკუთვნოდა უშუალოდ რეჟისორს. თეატრში გვითხრეს, რომ სტურუა ამჟამად საქართველოში არ იმყოფება, ხოლო კონკრეტულად რომელი ანგარიში ეკუთვნის რეჟისორს ვერ დაგვიდასტურებდნენ. რობერტ სტურუას ანგარიშის ნამდვილობა On.ge-ს თეატრის კრიტიკოსმა, ლაშა ჩხარტიშვილმა დაუდასტურა. მისივე თქმით, რეჟისორის ოფიციალური გვერდიც სწორედ ეს არის.

რობერტ სტურუა ქართული თანამედროვე თეატრისა და კინოს ერთ-ერთი უდიდესი რეჟისორია. მას დადგმული აქვს ისეთი ცნობილი და აღიარებული სპექტაკლები, როგორიცაა "კავკასიური ცარცის წრე", "სამანიშვილის დედინაცვალი", "მეფე ლირი", "ყვარყვარე", "რიჩარდ III" და ა.შ.

სხვადასხვა წლებში მას მიღებული აქვს რუსეთისა და საქართველოს სახელმწიფო პრემიები, საქართველოს ღირსების ორდენი, ჩაპლინ-კლუბის პრემია, მიხეილ თუმანიშვილის სახელობის პრემია, შოთა რუსთაველის სახელობის პრემია და სხვადასხვა საერთაშორისო პრემიები.