ფოთში ტაეკვონდოს ფედერაციის წარმომადგენლების შეხვედრა ფიზიკური დაპირისპირებით დასრულდა. შინაგან საქმეთა სამინისტროს ინფორმაციით, ძალადობის მუხლით 3 პირი დააკავეს.

სპორტსმენების ნაწილი მოითხოვს, რომ გადადგეს ფედერაციის პრეზიდენტი. მათი თქმით, დაპირისპირება სწორედ ამ საკითხს და პასუხად შეურაცხმყოფელ განცხადებებს მოყვა.

პრეზიდენტთან დაპირისპირებული სპორტსმენები ფედერაციას ბოიკოტს უცხადებენ და დახურულ მმართველობას აპროტესტებენ.

"წესდება ფედერაციას აქვს ისე მორგებული, რომ არცერთი ინსტრუქტორი, მასწავლებელი სპორტსმენი არ არის ჩახედული ფედერაციის მმართველობაში", — აცხადებს მწვრთნელი შოთა გოჩიაშვილი.

ფედერაციის ერთ-ერთი წარმომადგენელი რომეო გურშიძე ამბობს, რომ აზრთა სხვადასხვაობა "ყოველ ცოცხალ ორგანიზმში" ხდება და ეს ნორმალურია, თუმცა ძალადობა დასაგმობია.