შინაგან საქმეთა სამინისტროს ინფორმაციით, 14 ივნისს კანცელარიასთან მიმდინარე აქციისა და კონტრაქციის დროს ჟურნალისტური საქმიანობისთვის ხელის შეშლის ფაქტებზე გამოძიება დაიწყეს.

შსს-ს განცხადებით, მიმდინარე დღეებში დაგეგმილ სხვადასხვა აქციაზე დაიცავენ თითოეული ადამიანის როგორც შეკრების, ისე გამოხატვის თავისუფლებას, მათი პოლიტიკური შეხედულების, რელიგიური მრწამსის, სექსუალური ორიენტაციის და სხვა ნიშნის მიუხედავად, თუ გამოხატვის თავისუფლება არ გასცდება კანონით დასაშვებ ფარგლებს. უწყებ მოუწოდებს შეკრების მონაწილეებს, დაიცვან კანონის მოთხოვნები. წინააღმდეგ შემთხვევაში, ამბობენ, რომ პოლიცია იმოქმედებს მისთვის მინიჭებული მანდატის ფარგლებში.

14 ივნისს კონტრაქციის მონაწილეები აგინებდნენ აქტივისტებსა და ჟურნალისტებს და ემუქრებოდნენ მათ. ინციდენტები შეემთხვათ გამოცემების: ნეტგაზეთის, ლიბერალის, რადიო თავისუფლების, აჭარის ტელევიზიის, TV პირველისა და რუსთავი 2-ის ჟურნალისტებს.

ჰომოფობიური აქციის ერთი მონაწილე ხელით შეეხო ტელეკომპანია პირველის ჟურნალისტს. სიტყვიერ შეურაცხყოფას აყენებდნენ კონტრაქციის მონაწილეები რუსთავი 2-ის გადამღებ ჯგუფსაც.

ნეტგაზეთის ჟურნალისტს კონტრაქციის მონაწილემ სამართალდამცავების თვალწინ წაართვა და დაუგდო კონტრაქციის მონაწილემ ტელეფონი. ვიდეომასალაში ჩანს, რომ ჟურნალისტმა მოუწოდა პოლიციას რეაგირებისკენ, თუმცა უშედეგოდ. ასევე, პოლიციამ მოუწოდა რადიო თავისუფლების ჟურნალისტს გაცლოდა ტერიტორიას, როცა მას შეურაცხყოფას აყენებდნენ იმ მოტივით, რომ კონტრაქციის მონაწილეები "ღიზიანდებოდნენ".

"დაგალეწო, გინდა, ეგ ტელეფონი?"… "შენ დამახსოვრებული მყავხარ", — ამ სიტყვებით ემუქრებოდნენ ლიბერალის რედაქტორს, ლიკა ზაკაშვილსა და გამოცემის კიდევ ერთ ჟურნალისტს. გამოცემის ცნობით, ინციდენტის შემდეგ პოლიციამ აქციის ეს მონაწილე დააკავა.