სახელმწიფო უსაფრთხოების სამსახურის ანტიკორუფციული სააგენტოს ინფორმაციით, თაღლითობის მცდელობის ბრალდებით ერთი პირი დააკავეს. უწყების განცხადებით, ბრალდებული დაუკავშირდა თურქეთის მოქალაქეს, რომელსაც დარღვევით შემოჰქონდა საზღვარზე საქონელი და მას 13 000 ლარის სანაცვლოდ დახმარებას დაპირდა.

უწყებაში განმარტავენ, რომ ბრალდებული დაპირდა მას, რომ სამართალდამცავი ორგანოების მაღალჩინოსნების დახმარებით დააჩქარებდა საქონლის განბაჟებასთან დაკავშირებულ პროცედურებს და ტვირთის მესაკუთრისთვის დაბრუნებას. მათი თქმით, ბრალდებულმა თურქ ბიზნესმენს წინასწარ 6 000 ლარიც გამოართვა, რა დროსაც ის დააკავეს.

საქმეზე გამოძიება საქართველოს სისხლის სამართლის კოდექსის 19-180-ე მუხლის მე-3 ნაწილის ბ ქვეპუნქტით მიმდინარეობს, რაც თაღლითობას გულისხმობს და ითვალისწინებს
თავისუფლების აღკვეთას ვადით 6-დან 9 წლამდე.