დენი ვილნევის ფილმი დიუნი, რომელიც ამავე სახელწოდების წიგნის ადაპტაციაა, შემდეგ წელს გამოდის, სადაც ჰოლივუდის შთამბეჭდავი სამსახიობო შემადგენლობა ითამაშებს. ფილმისთვის მუსიკას ჰანს ციმერი შექმნის. კომპანია Legendary Entertainment და დიუნის სამყარო კიდევ ბევრ რამეს გვპირდებიან. ერთ-ერთი მათგანი კი ფილმის სპინოფი, ტელესერიალი The Sisterhoodი-ია, რომელიც მზადების პროცესშია.

The Sisterhood ფრენკ ჰერბერტის საკულტო წიგნზე, დიუნზე იქნება დაფუძნებული და მოქმედება იმავე სამყაროში განვითარდება. თუმცა, როგორც სათაურიდან ჩანს, სერიების სცენარი "ბენე გესერიტის" ქალთა ორდენის პერსპექტივიდან დაიწერება. The Hollywood Reporter-ში გამოქვეყნებული სინოფსისი კი პროექტს ასე აღწერს:

"ბენე გესერიტი" სხეულისა და გონების დაუფლების შემდეგ, ხელს უწყობს ფეოდალურ პოლიტიკას და იმპერიის ინტრიგებს, რაც საკუთარი გეგმების განხორციელებაში ეხმარება, ეს ყველაფერი კი მას იდუმალ პლანეტამდე — არაკისამდე მიიყვანს, რომელსაც იქ მაცხოვრებლები დიუნს უწოდებენ.

ტელეშოუ The Sisterhood-ს Legendary Television-ის ჯგუფი იღებს, თუმცა სტრიმინგის დისტრიბუციაში WarnerMedia-ც ჩაერთვება. ამ ეტაპზე, სტრიმინგის პლატფორმა უცნობია. დენი ვილნევმა პილოტი უკვე გადაიღო და თანასცენარისტ ჯონ სპაიტსთან ერთად სცენარზეც იმუშავა. ისინი ასევე პროექტის აღმასრულებელი პროდიუსერებიც იქნებიან.

"ბენე გესერიტი" ყოველთვის მომხიბლავი იყო ჩემთვის. ასეთ ძლიერ ქალთა ორდენეზე ფოკუსირება არა მხოლოდ რელევანტური და შთამბეჭდავია, ასევე, ძალიან დინამიური მიმართულებაა სატელევიზიო სერიებისთვის.

განაცხადა რეჟისორმა.

ეს არ არის პირველი შემთხვევა, როდესაც მცირე ეკრანისთვის დიუნის ადაპტაცია გააკეთეს. ასეთი მინი სერიალი 2000 წელს ტელეარხ SyFy-ზე გადიოდა, შემდეგ კი, 2003 წელს სერიალი Children of Dune მოჰყვა.

დენი ვილნევის სრულმეტრაჟიანი ფილმი კინოთეატრებში 2020 წლის 20 ნოემბერს გამოვა. ფილმში ითამაშებენ - ტიმოთი შალამე, სტელან სკარსგარდი, ხავიერ ბარდემი, დეივ ბაუტისტა, ზენდაია, ჯეისონ მომოა და სხვები.