თავისუფალი დემოკრატების ლიდერი, ირაკლი ალასანია დღეს გავრცელებულ ფარულ ჩანაწერს ეხმაურება და განმარტავს, რომ აუცილებელია ამ ჩანაწერის ავთენტურობის დადგენა:

"უსაფრთხოების სამსახურებმა უნდა შეისწავლონ და დაადასტურონ ავთენტურობა ამ ჩანაწერის. იმიტომ ვიხდით ფულს უსაფრთხოების სამსახურებში, რომ მათი საქმე გააკეთონ და დაადასტურონ მართალია ან ავთენტურია ეს ჩანაწერი. აშკარად აქ არის დანაშაულის ნიშნები, ამიტომ, კატეგორიულად მოვითხოვ უსაფრთხოების სამსახურებისგან, რომ გამოძიება ჩაატარონ ობიექტურად და რეალობა გააცნონ ქართულ საზოგადოებას. ბუნებრივია, ასევე აღვნიშნავ იმას, რომ ვერანაირი, არანაირი დესტაბილიზაცია ჩვენს ქვეყანაში არ მოხდება იმიტომ, რომ ქართველ ხალხს მობეზრდა დაძაბულობა, დაპირისპირება და მათ უნდათ გამთლიანება ქვეყნის. ამიტომ, თავისუფალი დემოკრატები და საზოგადოება არანაირ არეულობას არ დავუშვებთ".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენთურობა ჯერ დადგენილი არ არის.

სუსის ინფორმაციით, სახელმწიფო უსაფრთხოების სამსახურის კონტრდაზვერვის დეპარტამენტში გამოძიება საქართველოს სისხლის სამართლის კოდექსის 315-ე მუხლის 1-ლი ნაწილით დაიწყო, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.