საქართველოს საგარეო საქმეთა მინისტრმა, დავით ზალკალიანმა ბრიუსელში უკრაინის პრეზიდენტისა და საქართველოს პრემიერის შეხვედრა შეაფასა და განაცხადა, რომ სტრატეგიულ პარტნიორებთან ექსპრეზიდენტ მიხეილ სააკაშვილს არ განიხილავენ. მისი თქმით, საააკაშვილის საკითხი "სრულიად უმნიშვნელოა", თავად კი "უფრო სერიოზული თემებით არიან დაკავებული."

ზალკალიანმა ჟურნალისტებს განუცხადა, რომ ვოლოდიმირ ზელენსკისა და მამუკა ბახტაძის შეხვედრა ფარული არ ყოფილა და წინასწარ იყო დაგეგმილი. საგარეო საქმეთა მინისტრი განმარტა, რომ ღონისძიება, რომელზეც ორი ქვეყნის ლიდერი ერთმანეთს შეხვდა ევროკავშირში ამერიკის შეერთებული შტატების ელჩმა დაგეგმა. მისი თქმით, ერთი თვით ადრე მიღების დაგეგმვა მიღებული პრაქტიკაა და ამაოა ოპონენტების მცდელობა, შეცდომაში შეიყვანონ მოსახლეობა.

"მაღალი თანამდებობის პირების გამოჭერა კორიდორებში, ხელის ჩამორთმევის ფოტოების გადაღება და შემდეგ ამის წარმოჩენა, როგორც მნიშვნელოვანი ორმხრივი შეხვედრის, ეს ჩვენი ხელწერა არ არის და ძალიან კარგად გვახსოვს თუ როგორც ხდებოდა მსგავსი ქმედებების მიტანა საზოგადოებამდე. ჩვენ ძალიან ღიად ვმუშაობთ და არ გვჭირდება არანირი ფარული შეხვედრები არავისთან", — განაცხადა მინისტრმა.

რუსთავი 2-მა გაავრცელა ინფორმაცია, რომ ბრიუსელში ვიზიტისას საქართველოს პრემიერი უკრაინის პრეზიდენტს შეხვდა და სავარაუდოდ, ექპსრეზიდენტ მიხეილ სააკააშვილის საკითხი განიხილეს. ეს ინფორმაცია უარყო თავად ვოლოდიმირ ზელენსკიმ. მანვე აღნიშნა, რომ ამ ეტაპზე სააკაშვილზე არანაირი პოლიტიკური გეგმები არ აქვს და მას, უბრალოდ, მოქალაქეობა დაუბრუნა.