დავით სარალიძის მკვლელობაში ბრალდებულის ძმა ლუკა კალანდია ამბობს, რომ მას და მამამისს დაკავების მოლოდინი აქვთ, რადგან მთავრობას ღიად დაუპირისპირდნენ. მისი თქმით, უკან დახევას არ აპირებენ და ურჩევნიათ თავად მოიხადონ სასჯელი დანაშაულის დაფარვის ბრალდებით, ვიდრე უდანაშაულო მიხეილ კალანდია დაისაჯოს.

"დიდი ალბათობით დაგვაკავებენ. ალბათ, დანაშაულის დაფარვის ბრალდებით. სწორედ ამიტომ ჭიანურდებოდა 9 თვის განმავლობაში ჩვენი სასამართლოები, რომ ბერკეტი ქონოდათ მიხეილ დაკავების შემთხვევაში, ჩვენ ხმას არ ამოვიღებდით და თავს დავუხრდიით ყველაფერზე. მეც და მამაჩემსაც გვირჩევნია, რომ ის 2 და 4 წელი, რაც იქნება სასჯელი მოვიხადოთ და მიხეილი არ წავიდეს 15-წლიან უდანაშაულო სასჯელზე", — განუცხადა მან ჟურნალისტებს.

ლუკა კალანდიას ძმა ამბობს, რომ მისი ოჯახი ყოველთვის ნეიტრალური იყო და "ხმას არ იღებდნენ". მისი თქმით, მიხეილ კალანდია პროკურატურის ოქროს მოწმე იყო და ყველა საქმეში სათავისოდ გამოიყენეს, ახლა კი პოლიტიკური ინტერესის გამო გაწირეს.

ლუკა კალანდიამ განაცხადა ისიც, რომ მისი ძმა ჩვენებებს მერაბ მორჩაძის ზეწოლის გამო ცვლიდა. მისივე თქმით, მკვლელობის ღამეს თავადაც დაწერილ ჩვენებას მოაწერა ხელი, რადგან უმცროსი დისა და დედის დაჭერით ემუქრებოდნენ.

მიხეილ კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით დღეს, 4 ივნისს მას შემდეგ დააკავეს, რაც გუშინ სააპელაციო სასამართლოს განაჩენი დადგა. სააპელაციომ განაცხადა, რომ დავით სარალიძე ბრალდებულმა გ.ჯ.-მ დაუდგენელ პირებთან ერთად მოკლა. შინაგან საქმეთა სამინისტროში განაცხადეს, რომ პირველი ინსტანციის განაჩენის შემდეგ მათ მოიპოვეს მტკიცებულებები, რომლებიც მკვლელობაში კალანდიას თანამონაწილეობის ეჭვს ამყარებდა.

ვინ არის მიხეილ კალანდია

მიხეილ კალანდია 2017 წლის პირველ დეკემბერს ხორავას ქუჩაზე მოზარდებს შორის მომხდარი კონფლიქტის ერთ-ერთი მონაწილეა. კალანდიამ გამოძიებისა და სასამართლო პროცესის დროს ჩვენება არაერთხელ შეცვალა. მან პირველად თქვა, რომ ბრალდებულ არასრულწლოვნებს ჩხუბის დროს დანა არ ჰქონიათ. მომდევნო პროცესზე კი მოწმემ ჩვენების შეცვლა გასულ პროცესზე ბრალდებული მეგობრების დაცვის სურვილით ახსნა. კალანდიამ სასამართლოზე დეტალურად ისაუბრა, თუ ვის ეჭირა დანა, ვინ ურტყამდა დანას. მან ასევე თქვა, რომ თავად მოგვიანებით, რამდენიმე წამით შევიდა ფარდულში გასაშველებლად. კალანდიას მიერ შეცვლილი საბოლოო სცენარი, ემთხვევა პროკურატურის ვერსიას.

ხორავას ქუჩაზე მოკლული დავით სარალიძის მამა, ზაზა სარალიძე ცრუ ჩვენებისთვის მიხეილ კანალდიას სისხლისსამართლებრივ პასუხისმგებლობას ითხოვს.

პარლამენტში შექმნილმა დროებითმა საგამოძიებო კომისიამ შინაგან საქმეთა სამინისტროს ორი რეკომენდაციით მიმართა, რომ დაიწყოს სისხლისსამართლებრივი დევნა კალანდია მიმართ, დავით სარალიძის ჯგუფურად მკვლელობაში თანამონაწილეობის საქმეზე.

2018 წლის ივნისში შსს-მ დააკავა მერაბ მორჩაძე, რომელიც საქმეში მონაწილე ერთ-ერთი მოზარდის ნათესავია. უწყება მას მიხეილ კალანდიაზე ზეწოლას ედავებოდა. მორჩაძემ ბრალი აღიარა და ის სასამართლო დარბაზიდან გაათავისუფლეს.

შსს-ში აცხადებდნენ, რომ მორჩაძე სასამართლოში ჩვენების შეცვლის მიზნით, გავლენა მოახდინა დანაშაულის დაფარვაში ბრალდებულ მიხეილ კალანდიაზე, რომელიც მკვლელობის ჩადენაში ამხელდა მერაბ მორჩაძის მეგობრის შვილს, ბრალდებულ გ.ჯ.-ს. მათივე თქმით, მერაბ მორჩაძე არაერთხელ შეხვდა ძმებ კალანდიებს, ბრალდებულ გ. ჯ.-ს სასარგებლოდ ჩვენების შეცვლის მიზნით, გადასცა მათ გარკვეული თანხა.