გადაცემა შეხვედრები რეგიონულ მედიასთან ჟურნალისტმა ბიძინა ივანიშვილს მიხეილ სააკაშვილის მიერ გაკეთებული განცხადება შეახსენა, რომლის თანახმადაც, რა შედეგიც იქნება რუსთავი 2-ის ეგზიტპოლში, ის იქნება ვერდიქტი:

"ის ასევე ამბობს, რომ სიმართლე შეიკრიბება ერთ დიდ მდინარედ, რომელიც შემდეგ იქცევა წარღვნად ივანიშვილის ოცნებისთვის და მოხდება დემოკრატიის საბოლოო გამარჯვება საქართველოში".

აღნიშნულთან დაკავშირებით ივანიშვილმა განმარტა, რომ რუსთავი 2 მხოლოდ სიცრუის ეტალონად გამოდგებოდა:

"სააკაშვილისგან ნახსენები წარღვნა ნუ დაძაბავს მოსახლეობას, კიდევ ერთხელ შევახსენებ. საკუთარი გუნდის შემაგრებას აგრძელებს ისევ, რომ არ ჩამოეშალოს, რომ აი, მე ჩამოვალ და საოცრებებს მოვახდენ. სად ჩამომსვლელია ეგ საცოდავი, ლიფტში ეშინია არ გაიჭედოს, დაკეტილი სივრცის. წარღვნად ალბათ ის იგულისხმება, რომ თავისიანებს ამძაფრებს, რომ თუ გაგვიყალბეს და რუსთავი 2-ს არ მოვერგეთ... როგორ შეიძლება, რომ საქართველოს ხელისუფლებაზე დღეს გაიფიქრო, რომ ამის მცდელობა მაინც ექნებათ. თვითონაც კარგად იციან და ისიც კარგად იციან, რომ არავითარი შანსი არ აქვთ".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.