უკრაინის ახლადარჩეულმა პრეზიდენტმა, ვოლოდიმირ ზელენსკიმ 4 ივნისს ნატოს გენერალურ მდივანთან გამართულ ერთობლივ პრესკონფერენციაზე თქვა, რომ ის მზადაა რუსეთთან სამშვიდობო დიალოგისთვის, დონბასსა და აღმოსავლეთ უკრაინაში.

"ჩვენ მზად ვართ, შევასრულოთ მინსკის ხელშეკრულება. მიუხედავად ამისა, ჩვენ უნდა დავიცვათ თავი და გავხდეთ უფრო ძლიერები ეკონომიკურად, პოლიტიკურად და სამხედრო თვალსაზრისით... მადლიერი ვარ, უკრაინის მიმართ იმ პოლიტიკური და პრაქტიკული მხარდაჭერისთვის, რასაც ჩრდილოატლანტიკური ალიანსისგან ვიღებთ. რუსეთის შეიარაღებული აგრესია ევრო-ატლანტიკური უსაფრთხოების მთავარ გამოწვევად რჩება", — თქვა ზელენსკიმ პრესკონფერენციაზე.

ზელენსკის თქმით, საერთო ამოცანაა, სტაბილურობისა და უსაფრთხოების უზრუნველყოფა შავი ზღვის რეგიონში:

"უკრაინის სტრატეგიული კურსია, გახდეს ევროკავშირისა და ნატოს სრულუფლებიანი წევრი. ეს დაცულია უკრაინის კონსტიტუციით და უცვლელად რჩება ჩვენი საგარეო პოლიტიკის პრიორიტეტად".

4-5 ივნისს ვოლოდიმირ ზელენსკის პირველი ოფიციალური ვიზიტი იმართება ბრიუსელში. ვიზიტის პირველ დღეს ის უკვე შეხვდა ევროკომისიის პრეზიდენტ ჟან კლოდ იუნკერს.