მნიშვნელოვანია, მშობლებმა იყოჩაღონ და თავიანთი შვილებისთვის ადრეულ ასაკშივე გააკეთონ სიკეთე, რომელიც მათ მომავალში აუცილებლად დაუფასდებათ. ეს კი, შესაძლოა, წიგნთან ბავშვობიდანვე ურთიერთობა და მისი შეყვარება იყოს. ესეც 3 ქართული წიგნი, რომლითაც ბავშვებს კითხვას შეაყვარებთ:

ანა ჯანელიძე და ალექს ჩიღვინაძე - ჰიპა ირჩევს პროფესიას

ფოტო: გამომცემლობა "ზოლიანი კატა"

ჰიპა გახლავთ კატა, რომელმაც გადაწყვიტა პროფესია აერჩია. მან ბევრი რამ სცადა: ტატუ არტისტობა, ასტრონავტობა, მეტეოროლოგობა, გამომძიებლობა, მაგრამ რიგი მიზეზებოს გამო, არც ერთი გამოუვიდა. ბოლოს კი, ამ ყველაფერის შესახებ წიგნი დაწერა.

"გუშინ საშინელი დღე მქონდა - მხოლოდ ოცი საათი მეძინა! და ეს, რა თქმა უნდა, ჩემი მდგმურების, ანას და ალექსის ბრალია. რა უნდა აკეთო გამოუძინებელმა? პროფესიას მაინც ავირჩევ მეთქი. რა არ ვცადე? საბოლოოდ კი წიგნი დავწერე კატაზე, რომელიც ირჩევს პროფესიას."

ანა ჯანელიძე, ალექს ჩიღვინაძე და ლაშა ბაქრაძე - ჩიტები თბილისში

ფოტო: გამომცემლობა "ზოლიანი კატა"

სამართლიანობისთვის უნდა ითქვას, რომ ეს წიგნი, ქალაქის ესთეტიკის უკეთ შეცნობაში არამხოლოდ ბავშვებს, არამედ ზრდასრულებსაც დაგვეხმარება.

როგორია მერცხლების თვალით დანახული თბილისი? — "გინატრიათ, ოდესმე ნეტავ მეც შემეძლოს ჩიტივით ფრენაო? ამ წიგნში ეს შესაძლებელია. გაჰყევით მერცხლებს და ზემოდან თითქმის მთელ თბილისს დაინახავთ. ფრენის გაკვეთილები კი სულ არ არის მოსაწყენი, როცა მამა თბილისის შესახებ საინტერესო ამბებს უყვება თავის ბარტყს. თქვენც მიჰყევით უჩას და ჩიორას და შემოიფრინეთ მთელი ქალაქი."

ანა ჯანელიძე და ალექს ჩიღვინაძე - იცეკვე, ალუბალა. იცეკვე!

ფოტო: გამომცემლობა "ზოლიანი კატა"

ამბავი იმისა, თუ როგორ გახდა ჩიტი ალუბალა ქვეყნის ყველაზე პოპულარული მოცეკვავე.

"ილუსტრირებული ზღაპარი იცეკვე, ალუბალა. იცეკვე! ყველაზე მხიარული ჩიტის, ალუბალას შესახებ მოგვიხრობს. ალუბალა იყო ერთი ჩიტი, რომელიც სულ ცეკვავდა. ყველგან ცეკვავდა, ჰაერში, ტოტებზე თუ ხილის გროვაზე. მოცეკვავე ჩიტზე სტატიებით და ფოტოებით აჭრელდა ჟურნალები."