საქართველოს მთავრობა სტარტაპების დაფინანსების პროგრამას იწყებს - აღნიშნული გადაწყვეტილების შესახებ პრემიერ მინისტრმა, გიორგი კვირიკაშვილმა, დღეს, 5 მაისს, გამართულ მთავრობის სხდომაზე ისაუბრა.

გიორგი კვირიკაშვილის თქმით, პროგრამის მონაწილე შეიძლება გახდეს საქართველოს ნებისმიერი მოქალაქე, ვისაც აქვს ინოვაციური, საინტერესო ბიზნეს წინადადება და მისი განხორციელებისთვის ესაჭიროება დაფინანსება.

პრემიერის თქმით, პირველ ეტაპზე პროგრამისთვის გამოიყოფა 11 მლნ ლარი, ხოლო შემდეგ ბიუჯეტი გაიზრდება 35 მლნ ლარამდე:

"დღეს ჩვენ დავამტკიცებთ დამწყები ბიზნესის დაფინანსებისთვის საფინანსო ინსტიტუტის მუშაობის ძირითად პრინციპებს, ხოლო ერთი თვის თავზე ეს ინსტიტუტი დაიწყებს ფუნქციონირებას ინოვაციებისა და ტექნოლოგიების პარკის შენობაში".

პრემიერ მინისტრის ინფორმაციით, პროგრამის კოორდინატორები არიან საპარტნიორო ფონდი და საქართველოს ინოვაციების და ტექნოლოგიების სააგენტო. პროგრამის ამოქმედების პროცესში ასევე ჩაერთვებიან საერთაშორისო ექსპერტები.

მთავრობის სხდომა ამ წუთებშიც მიმდინარეობს. მინისტრთა კაბინეტი სულ 35 საკითხის განხილვას გეგმავს.