თბილისის ივანე ჯავახიშვილის სახელობის სახელმწიფო უნივერსიტეტში სასწავლო წლის დაწყებას სტუდენტური მოძრაობა აუდიტორია 115 საპროტესტო აქციით ხვდება. უნივერსიტეტში დილიდან იმყოფებიან მთავრობის წევრები, მათ შორის განათლების მინისტრი, რომლებიც სტუდენტებს სასწავლო წლის დაწყებას ულოცავენ.

აუდიტორია 115-ის წევრმა გიორგი ჯოხაძემ ჟურნალისტებს განუცხადა, რომ მათი პროტესტის მთავარი მიზეზი კვლავ სისტემურ პრობლემებს უკავშირდება:

"უნივერსიტეტის სასწავლო პროცესი დღესაც იწყება აქციით ისე, როგორც წინა წლებში ხდებოდა. ეს გამოწვეულია იმიტომ, რომ ჩვენი ძირეული მოთხოვნები რეფორმების შესახებ, რაც მარტში გავაჟღერეთ, არ შესრულდა. რექტორად დაგვისვეს ადამიანი შიდა კლანებთან გარიგების შედეგად, რომელიც იკავებდა მინისტრის მოადგილის პოსტს და მაინც არაფერი არ გააკეთა".

აუდიტორია 115-ის კიდევ ერთი წევრი, მარიამ ნანეიშვილი ასევე ამბობს, რომ მათი მთავარი მოთხოვნა ხარისხიანი განათლების მიღებაა, რასაც თსუ-ში ვერ ახერხებენ:

"ვითხოვთ პირდაპირ საბიუჯეტო დაფინანსებას, რადგან ვაუჩერული დაფინანსების გამო რა დღეშიც არის უნივერსიტეტი, ყველანი კარგად ვხედავთ, მეცნიერება, ფაქტობრივად, არ არსებობს უნივერსიტეტში".

თსუ ახალ სასწავლო წელს ახალი რექტორით ხვდება. 23 სექტემბერს გამართულ რექტორის არჩევნებში განათლების მინისტრის ყოფილმა მოადგილემ, გიორგი შარვაშიძემ გაიმარჯვა.