საქართველოს პარლამენტის ეროვნული ბიბლიოთეკის დამოუკიდებლობის დარბაზში გამოფენა "წიგნები საქართველოზე" გაიმართა. 750-მდე უცხოენოვანი გამოცემა, რომელიც 2018 წელს ფრანკფურტის წიგნის ბაზრობაზე საქართველოს საპატიო ქვეყნის პავილიონში იყო გამოფენილი, ეროვნულ ბიბლიოთეკას ქართული წიგნის ეროვნულმა ცენტრმა გადასცა. ეს კოლექცია მოგვიანებით ეროვნული ბიბლიოგრაფიის საარქივო ფონდში იქნება დაცული.

ამ ფონდის 300-ზე მეტი უცხოენოვანი გამოცემა ქართული წიგნის ეროვნული ცენტრისა და საქართველოს განათლების, მეცნიერების, კულტურისა და სპორტის სამინისტროს ხელშეწყობითაა გამოცემული. 30 ენაზე თარგმნილი 250-მდე ქართველი ავტორის შემოქმედება 155 უცხოელმა გამომცემელმა ცენტრთან თანამშრომლობით გამოსცა. მათ შორისაა ქართული ლიტერატურის სხვადასხვა ჟანრის თარგმანები (პროზა, პოეზია, დოკუმენტალისტიკა, ილუსტრირებული წიგნები, Art Book-ები, საბავშვო/საყმაწვილო და სახელოვნებო ლიტერატურა), როგორც თანამედროვე, ისე ძველი ქართული ლიტერატურა, ჰაგიოგრაფია, ფოტოწიგნები, გამოცემები ქართულ კულინარიაზე, არქიტექტურასა და ინტერიერის დიზაინზე, ფოლკლორზე, საქართველოს ისტორიაზე, კულტურაზე და სხვა.

კოლექცია ასევე მოიცავს მსოფლიოს სხვადასხვა ქვეყანაში დამოუკიდებელი უცხოელი გამომცემლების მიერ ქართული ლიტერატურისა და ზოგადად საქართველოზე გამოცემულ წიგნებს.

"ეროვნული ბიბლიოთეკა უმნიშვნელოვანესი ფონდით გამდიდრდა. წიგნის ცენტრმა ბოლო პერიოდის უმთავრესი კულტურული ფორუმის, ფრანკფურტის წიგნის ფესტივალის ფარგლებში გამოფენილი 750 უცხოურ ენაზე გამოცემული ქართული წიგნი გადმოგვცა. მალე ეროვნულ ბიბლიოთეკაში ფრანკფურტის პავილიონის მცირე მაკეტი მოეწყობა და ამ გამოცემებთან ერთად მუდმივმოქმედ გამოფენას შემოგთავაზებთ”- განაცხადა გიორგი კეკელიძემ.

გამოფენის გახსნას დაესწრნენ საქართველოში გერმანიის ელჩის მოადგილე მიხაელ ფაბრი და ფრანგული ინსტიტუტის დირექტორი პიერ კლუე.