ბიზნესმენ ვალერი გელაშვილის ცემის საქმეზე სასამართლომ ყოფილ მაღალჩინოსნებსა და ფინანსთა და შინაგან საქმეთა სამინისტროებს მორალური ზიანის ასანაზღაურებლად ჯამში 215 ათასი ლარის გადახდა დააკისრა. თბილისის საქალაქო სასამართლომ ექს-პრეზიდენტ მიხეილ სააკაშვილის, შს-ს ყოფილი მინისტრის, ვანო მერაბიშვილის, ამავე უწყების მაღალჩინოსნის, ერეკლე კოდუას მონაწილეობით საქმეზე მიიღო გადაწყვეტილება.

როგორც გელაშვილის ადვოკატმა, კახა კოჟორიძემ On.ge-ს უთხრა, დაზარალებული თანხას მას შემდეგ მიიღებს, რაც გადაწყვეტილება ძალაში შევა. მანამდე მხარეებს გადაწყვეტილების გასაჩივრება შეუძლიათ.

"ჩვენ შეგვიძლია, რომ ჩამოთვლილი პირებიდან თითოეულ მათგანს მოვთხოვოთ სრულად გადახდა. მაგალითად, თანხის გადახდა შეგვიძლია მარტო ფინანსთა სამინისტროს ან მარტო შსს-ს დავაკისროთ. შეგვიძლია თანხის გადახდა დავაკისროთ მხოლოდ ერთს ან რამდენიმე პირს. მაგრამ თუ რომელიმე საბიუჯეტო ორგანიზაცია ამას გადაიხდის მთლიანად, მას შეეძლება ამ თანხის ბიუჯეტისთვის ანაზღაურება მოსთხოვოს რომელიმე პირს, ვისი ბრალეული მოქმედების გამო გელაშვილს მიადგა ზიანი".

გელაშვილის ცემის საქმე

2005 წლის 29 ივნისს გაზეთ რეზონანსში გამოქვეყნდა საქართველოს პარლამენტის იმჟამინდელი წევრის ვალერი გელაშვილის სტატია სათაურით "ვალერი გელაშვილი თავის სახლს სააკაშვილს დაუთმობს". სტატიაში ვალერი გელაშვილი გამოთქვამდა უკმაყოფილებას მოქმედი პრეზიდენტის მიმართ იმასთან დაკავშირებით, რომ მას წაართვეს ქონება, რომლის ღირებულებასაც არ უნაზღაურებდნენ. ამავე სტატიაში მან შეურაცხმყოფელი ფორმით ისაუბრა საქართველოს ყოფილი პრეზიდენტის მიხეილ სააკაშვილის პირადი ცხოვრების შესახებ.

პროკურატურის განმარტებით, სტატიის გამოქვეყნების შემდეგ, მიხეილ სააკაშვილმა ვალერი გელაშვილის სამაგალითოდ დასჯისთვის ვანო მერაბიშვილს გელაშვილის ცემის დავალება მისცა.

14 ივლისს სოდ-ის თანამშრომლებმა თბილისში გააჩერეს ვალერი გელაშვილის მანქანა და თავს დაესხნენ გელაშვილს და მის თანმხლებ პირებს, სცემეს და გაიტაცეს მისი იარაღი, 10 ათასი დოლარი და 50 ათასი ლარის ღირებულების ბეჭედი. თავდასხმის შედეგად ვალერი გელაშვილმა მიიღო სხეულის მძიმე ხარისხის დაზიანება.

თბილისის საქალაქო სასამართლომ 2012 წლის 28 დეკემბერს მიხეილ სააკაშვილი დამნაშავედ სცნო უფლებამოსილების გადამეტებაში ძალადობითა და იარაღის გამოყენებით და ჯგუფურად ჯანმრთელობის განზრახ მძიმე დაზიანების ორგანიზებაში.

ვალერი გელაშვილზე განხორციელებული თავდასხმის საქმეზე სასამართლოს მიერ გამამტყუნებელი განაჩენი უკვე გამოტანილია შინაგან საქმეთა ყოფილი მინისტრის, ვანო მერაბიშვილის, სპეციალური ოპერატიული დეპარტამენტის ყოფილი დირექტორისა და ამავე დეპარტამენტის სამმართველოს ყოფილი უფროსის მიმართ