განახლება: ჩუგოშვილი მიმართვას ფეისბუქგვერდზე გამოეხმაურა. მან განაცხადა, რომ სტუდენტის საკონტაქტო ინფორმაცია არ აქვს და სთხოვა მას დაუკავშირდეს.

ბათუმის სახელმწიფო უნივერსიტეტის სტუდენტი, რომელმაც ლექტორი ომარ მახარაძე სექსუალურ შევიწროებაში დაადანაშაულა, საქართველოს პარლამენტის თავმჯდომარის პირველი მოადგილეს, თამარ ჩუგოშვილს მიმართავს. სტუდენტი გოგო ჩუგოშვილს მხარდაჭერას და მიმდინარე პროცესში ჩართვას სთხოვს. მისი მიმართვა ბათუმელებმა გაავრცელა.

"მოგმართავთ მხარდაჭერისთვის, როგორც ქალს, გავლენიან პოლიტიკოსს, გენდერული თანასწორობის საბჭოს თავმჯდომარეს. მოგმართავთ სტუდენტი და გთხოვთ თვალი ადევნოთ საქმის მსვლელობას. გამოიჩინოთ კეთილი ნება და პროცესში ჩაერთეთ მაქსიმალურად...

მე მაინც მჯერა, რომ სიმართლე გაირკვევა და მე არ დავიჩაგრები. პატივისცემით სტუდენტი, რომელიც თავის სახელს ვერ წერს", — წერია მიმართვაში.

სტუდენტი ამბობს, რომ არ სჯერა მახარაძის არგუმენტების იმის შესახებ, რომ ტელეფონი გაუტეხეს და მესიჯებს თავად არ გზავნიდა. მისი თქმით, ბრძოლას აგრძელებს, ცდილობს ღირსება და უფლებები დაიცვას და სხვა სტუდენტებს მისცეს მაგალითი.

თამარ ჩუგოშვილს ამ საკითხზე ამ დრომდე კომენტარი არ გაუკეთებია. რამდენიმე დღის წინ მან უარი განაცხადა შეეფასებინა ქართული ოცნების წევრის, ირაკლი ღარიბაშვილის სექსისტური განცხადება. შეფასებებისგან თავი არ შეუკავებია ჩუგოშვილს მაშინ, როცა On.ge-მ ზუგდიდის საკრებულოს თავმჯდომარის მოადგილის, თაზო ფაცაციას სექსისტურ ფეისბუქპოსტზე ჰკითხა. მაშინ ის ფაცაციას ამ ნათქვამს ემიჯნებოდა.

სექსუალური შევიწროების ბრალდება ლექტორს

მას შემდეგ, რაც სტუდენტმა ომარ მახარაძე შევიწროებაში დაადანაშაულა უნივერსიტეტმა მას სტუდენტებთან სააუდიტორიო საქმიანობა დროებით შეუჩერა. უნივერსიტეტში ჩატარდა დისციპლინური საბჭოს სხდომაც, სადაც სხვა სტუდენტებმაც წარადგინეს მტკიცებულებები. კომისიის თავმჯდომარემ განაცხადა, რომ შეხვედრამ ეჭქვეშ დააყენა ლექტორის პოზიცია.

ამავრდოულად, მახარაძე ბათუმის საკრებულოს წევრიცაა. ის ასევე სახელისუფლებო პარტია ქართული ოცნების გავლენიანი წევრია ბათუმში. ბათუმის საკრებულოს თავმჯდომარემ, სულიკო თებიძემ განაცხადა, რომ ყოველგვარ ძალადობასა და შევიწროებას გმობს. მისი თქმით, გამოძიების შედეგებს დაელოდებიან და ხელს არავის დააფარებენ.

საქმეზე გამოძიება თავდაპირველად სისხლის სამართლის კოდექსის 150-ე მუხლით დაიწყო, რაც იძულებას გულისხმობს. მოგვიანებით კი მუხლი დამშიმდა და გამოძიება სისხლის სამართლის კოდექსის 139-ე მუხლით გაგრძელდა, რაც სექსუალური ხასიათის ქმედების იძულებას გულისხმობს.