ბათუმის საკრებულოს თავმჯდომარე სულიკო თებიძე ამბობს, რომ საკრებულო ყოველგვარ ძალადობასა და შევიწროებას გმობს. ასე გამოეხმაურა თებიძე ბათუმის სახელმწიფო უნივერსიტეტში ლექტორის მიერ სტუნდენტის სავარაუდო სექსუალურ შევიწროებას.

გამოცემა ბათუმებელის ცნობით, სექსუალურ შევიწროებაში დადანაშაულებული ლექტორი ბათუმის საკრებულოს უმრავლესობის წევრია. ამასთან დაკავშირებით თებიძე ამბობს, რომ ვინც არ უნდა იყოს, თანამდებობის დატოვება მოუწევს.

"რამდენადაც ჩემთვის ცნობილია, არაოფიციალურად, საკრებულოს წევრისგან დაფიქსირდა იძულების ფაქტი. ჩვენ გამოძიების შედეგებს დაველოდებით. ხელს არავის დავაფარებთ. ვინც არ უნდა იყოს, აგებს პასუხს. თუ თანამდებობის პირია, დატოვებს თანამდებობას და დეპუტატის მანდატს", — აჭარის ტელევიზიის ცნობით, თქვა მან.

ლექტორს ბათუმის შოთა რუსთაველის სახელობის სახელმწიფო უნივერსიტეტმა სტუდენტებთან სააუდიტორიო საქმიანობა დროებით შეუჩერა.

სტუდენტმა ლექტორი სექსუალური ხასიათის მიმოწერასა და შევიწროებაში გამოცემა ბათუმელებთან დაადანაშაულა. გამოცემის ცნობით, სტუდენტი ამბობს, რომ მას ამის დამადასტურებელი მიმოწერა და ფოტოსურათები აქვს.

შინაგან საქმეთა სამინისტრომ გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს.