დიდი ბრიტანეთის ყოფილი პრემიერ-მინისტრი დევიდ კამერონი ტერეზა მეის გადადგომას გამოეხმაურა და თქვა, რომ მან სწორი გადაწყვეტილება მიიღო. კამერონი 2016 წელს მას შემდეგ გადადგა, რაც რეფერენდუმზე მოსახლეობამ ევროკავშირიდან გასვლას დაუჭირა მხარი.

კამერონმა ტვიტერზე მეის გამოსვლას ძლიერი და გაბედული უწოდა:

"ტერეზა მართალია, რომ კომპრომისი ბინძური სიტყვა არაა და დაუღალავი ძალისხმევისთვის მადლობა უნდა გადავუხადოთ. ვიცი, რამდენად რთულია გააზრება იმის, რომ შენი დრო ამოიწურა და ახალი ლიდერია საჭირო. მან სწორი გადაწყვეტილება მიიღო — ვიმედოვნებ, რომ კომპრომისის სულისკვეთება გაგრძელდება".

ტერეზა მეი დიდი ბრიტანეთის პრემიერ-მინისტრობის პოსტს 7 ივნისიდან აღარ დაიკავებს. მან ამის შესახებ პრესკონფერენციაზე განაცხადა.

"აშკარაა, რომ დიდი ბრიტანეთის საუკეთესო ინტერესშია, ეს ძალისხმევა ახალმა პრემიერ-მინისტრმა გასწიოს. ვაცხადებ, რომ მე, როგორც კონსერვატიული პარტიის ლიდერი, თანამდებობას დავტოვებ 7 ივნისს. უკვე შევათანხმე ეს საკითხი პარტიის თავმჯდომარესთან, რომ ახალი ლიდერის არჩევის პროცესი მომდევნო კვირაში დაიწყოს", — თქვა ტერეზა მეიმ ბრიფინგზე.

მეის თქმით, კონსერვატიული პარტია განახლდება მომდევნო წელს და იქვე აღნიშნა, რომ მისი რწმენით, ბრექსიტი მაინც შედგება.