24 საათი გავიდა მას შემდეგ, რაც ცნობილი გახდა, რომ დავით გარეჯის მონასტერთან აზერბაიჯანის წარმომადგენლებს, სავარაუდოდ, გზა გაჰყავთ. ამის მიუხედავად საგარეო საქმეთა სამინისტროსთვის ამ დრომდე უცნობია არსებული სიტუაციის დეტალები. ამის შესახებ უწყების წარმომადგენელმა On.ge-სთან საუბრისას განაცხადა.

უწყებაში ამბობენ, რომ ელოდებიან საქართველო-აზერბაიჯანის საზღვრის დელიმიტაციის საკითხზე კომისიის სხდომის დასრულებას და შემდეგ გაავრცელებენ განცხადებას. მოლაპარაკებების შემდეგი რაუნდი, რომელიც ბაქოშ იმართება, დღეს 24 მაისს დასრულდება.

სამოქალაქო აქტივისტი დავით ქაცარავა დავით გარეჯიდან ავრცელებს ვიდეოკადრებს, სადაც ჩანს აზერბაიჯანის მხრიდან ბულდოზერებით მუშაობის პროცესი. ქაცარავა წერს, რომ ისევ არ უშვებენ ჩიჩხიტურზე და უდაბნოს მონასტერში.

23 მაისს ადგილობრივმა გიდმა ზვიად ანანიაშვილი ფეისბუქზე ფოტოები გაავრცელა, სადაც ასევე წერს, რომ დავით გარეჯში ჩიჩხიტურის მიმართულებით აზერბაიჯანის მხარეს გზა გაყავს. პარალელურად, საქართველო-აზერბაიჯანის სახელმწიფო საზღვრის სადელიმიტაციო კომისიის მორიგი სხდომა იმართება ბაქოში. გუშინვე, საქართველოს საგარეო საქმეთა მინისტრმა დავით ზალკალიანმა მთავრობის სხდომის დასრულებისას განაცხადა, რომ ინფორმაცია თავადაც მედიისგან გაიგო.

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ გასულ თვეში დროებით გაიხსნა. აზერბაიჯანელი მესაზღვრეები ამბობენ, რომ კლდეში ნაკვეთ სამონასტრო კომპლექსამდე ხალხს მხოლოდ აღდგომის დღესასწაულზე შეუშვებენ, მომდევნო კვირიდან კი შესაძლებელია გზა ისევ ჩაკეტონ. საგარეო საქმეთა სამინისტრომ და საზღვრის დაცვის სამსახურმა, ამ საკითხთან დაკავშირებით აზერბაიჯანულ მხარესთან კომუნიკაცია დაიწყო. სამინისტროს ცნობით, აზერბაიჯანელი მესაზღვრეების მხრიდან ქედს მიღმა მთამსვლელი ნაკადის შეიზღუდა.