იუსტიციის საბჭოს არამოსამართლე წევრი, ანა დოლიძე უნდობლობას უცხადებს იუსტიციის საბჭოს მიერ 30 სასამართლოში 43 მოსამართლის ვაკანტურ ადგილებზე გამწესების პროცესს. მისი თქმით, ეს არის "კლანის გადალაგება", რასაც ქართული ოცნებაც უწყობს ხელს.

"ეს არის კლანის დიდი გადალაგება, რომელიც დაშორებულია კონკურსის იდეას. კლანის წევრები გადალაგდნენ ერთი თანამდებობიდან მეორეზე. ამის საშუალებას იძლევა ის სრული ფარსი, რომელიც საქართველოს პარლამენტს შექმნილი აქვს საკონკურსო პროცედურის საშუალებით. იუდა ისკარიოტელი რომ გამოვიდეს, კონკურსზე კლანს აქვს საშუალება, რომ ის დანიშნოს ნებისმიერ თანამდებობაზე სასამართლოში", — განაცხადა ანა დოლიძემ.

მისი თქმით, კენჭისყრაში მიიღებს მონაწილეობას, თუმცა პროცედურების გათვალისწინებით "სიმბოლურიად" ჩაერთვება.

"ეს პროცედურა იმდენად ფასადურია, რომ საბჭოს წევრს შეუძლია დასაბუთების გარეშე საბუთებისა და ქულების მისადაგების გარეშე გადაალაგოს საკუთარი კოლეგები, როგორც სურს ისეთ თანამდებობებზე სასამართლოს შიგნით, ამიტომ ჩემი მონაწილეობა არის სრულიად სიმბოლური. ამის შესაძლებლობას იძლევა ის, რომ ქართული ოცნება არის მოტივირებული ამ კლანს ჩაუგდოს ხელში სასამართლოს ძალაუფლება", — განაცხადა ანა დოლიძემ.

კითხვაზე, რას ნიშნავს, როცა უზენაესი სასამართლოს მოსამართლეობის მსურველი გიორგი მიქაუტაძე პრეტენზიას აცხადებს ორ ვაკანტურ თანამდებობაზე საქალაქო და სააპელაციო სასამართლოებში, დოლიძე პასუხობს:

"თავისთავად ის, რომ პროცედურა, რასაც ჰქვია კონკურსი, უნდა ემსახურებოდეს ახალი კვალიფიციური კადრების შედინებას სასამართლო სისტემაში, რეალურ და სამართლიან შეჯიბრს. სინამდვილეში ის ემსახურება კლანის მოსამართლე წევრების ჭადრაკის დაფაზე გადალაგებას, ალბათ, იმისთვის, რომ მათ უკეთესად აკონტროლონ სასამართლო სისტემა. მათ უნდა ჰკითხონ, როგორ მოისურვა დროის ერთ მონაკვეთში კლანის წევრების უმეტესობამ ახალ თანამდებობაზე გადასვლა და როგორ მოხდა, რომ საბჭო ყველა ამ მოთხოვნას დააკმაყოფილებს".

საქართველოს იუსტიციის საბჭოს დღევანდელ სხდომაზე მოსამართლეობის კანდიდატების შესარჩევი კონკურსის კენჭისყრა გაიმართება. საბჭოს 43 ვაკანტური თანამდებობა 78 კანდიდატისგან უნდა დააკომპლექტოს.

კანდიდატებს შორის არის იუსტიციის საბჭოს 4 წევრიც, ვასილ მშვენიერაძე, რევაზ ნადარაია, ირაკლი ბონდარენკო და გიორგი მიქაუტაძე. მიქაუტაძე ამ დროისთვის იუსტიციის საბჭოს მდივნის მოვალეობას ასრულებს.

საბჭომ კონკურსი რამდენიმე თვის წინ გამოაცხადა, გასაუბრება ყველა კანდიდატთან, დაახლოებით 6 თვის შემდეგ დასრულდა. სწორედ ეს გახდა, საბჭოს არამოსამართლე წევრების ბრალდებების საფუძველი. ისინი, საბჭოს მოსამართლე წევრებს, კონკურსის მიზანმიმართულ გახანგრძლივებაში ადანაშაულებენ და პროცესს უზენაეს სასამართლოში მოსამართლეთა შერჩევის პროცესს უკავშირებენ.