საქალაქო სასამართლოში აუდიტის სამსახურის ყოფილი ხელმძღვანელის ლაშა თორდიას ცემის საქმის არსებითი განხილვა დაიწყო. საქმეზე ბრალდებული ყოფილი მთავარი პროკურორი ოთარ ფარცხალაძე სასამართლო დარბაზში მივიდა. მან ჟურნალისტების კითხვებს არ უპასუხა.

დაზარალებული ყოფილი აუდიტორის გამოკითხვა სკაიპით განხორციელდება. ბრალდებული ოთარ ფარხალაძე თორდიაზე ფიზიკური ანგარიშსწორებას უარყოფს და ამბობს, რომ ინციდენტი ლაშა თორდიას პროვოცირებული იყო.

თორდიას ცემის საქმეზე სასამართლო პროცესები რამდენიმეთვიანი პაუზის შემდეგ განახლდა. საქმის არსებითი განხილვა რამდენჯერმე გადაიდო. ერთხელ საქმის განმხილველი მოსამართლე მივლინებაში ყოფნის გამო. 2019 წლის თებერვალში კი პროცესის გადადების მიზეზი ბრალდებულის ჯანმრთელობის მდგომარეობა იყო.

ლაშა თორდიას ცემის საქმე

2017 წლის 12 მაისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. თორდია თავდასხმაში ყოფილ პროკურორ ფარცხალაძეს ადანაშაულებდა.

თორდიას მიაჩნდა, რომ თავდასხმა მისი სამსახურის მიერ ყოფილი პროკურორის შესახებ მასალების მოგროვებას უკავშირდება. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.

ბრალდებების პასუხად ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

"როგორც ჩანს, მას გულში აქვს ჩარჩენილი ჩემი გარკვეული ქმედებები სამართალდამცავ უწყებებში ჩემს საქმიანობასთან დაკავშირებით, რაზეც შესაბამის ინფორმაციას მივაწვდი გამოძიებას", — ამბობდა ფარცხალაძე. თუმცა, მომხდარიდან 4 დღის განმავლობაში ის დაკითხვაზე არ დაიბარეს. უწყებაში ამბობდნენ, რომ გამოძიების პრეროგატივა იყოს ის, თუ როდის დაკითხავდენ ყოფილ პროკურორს.

2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ყოფილი პროკურორი დაკითხეს.

ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

საქართველოს შინაგან საქმეთა სამინისტრომ აღნიშნული ინციდენტის გამოძიების შუალედური შედეგები გამოაქვეყნა. უწყების ინფორმაციით, ნეიტრალური მოწმეების გამოკითხვით დადგინდა, რომ ინციდენტის დროს პირველმა ხელი ლაშა თორდიამ მოიქნია და არა ფარცხალაძემ.